Úkimet basshysy stýdenttik jataqhana qurylysyn 10 jylǵa sozbaýdy tapsyrdy

ASTANA. QazAqparat - Búgin Úkimet otyrysynda QR Bilim jáne ǵylym mınıstri Erlan Saǵadıev stýdenttik jataqxanalardyń qurylysy boıynsha esep berdi. Atalǵan mindet Prezıdenttiń «Bes áleýmettik bastamasyna» kiredi, dep habarlaıdy QazAqparat tilshisi.

Mınıstrdiń aıtýynsha, osy ýaqytqa deıin barlyq normatıvtik aktiler qabyldandy. Qarjylandyrý máselesi de retteldi. Oǵan sáıkes, joǵary oqý oryndary tapsyrys berip, jataqxanalardy jekemenshik kompanııalarǵa saldyrtady. Al mınıstrlik árbir orynǵa sýbsıdııa berý arqyly qurylystyń shyǵyndaryn birtindep qaıtarady.

«Keshe eń alǵashqy jeti joǵary oqý orny jáne eki jekemenshik kompanııa arasynda kelisimsharttar rásimdeldi. Sonyń aıasynda tórt myńǵa jýyq jatyn orny bar jataqxanalar salý jumystary bastalyp ketti. Jalpy, 10 jyldyń ishinde 75 myń orynǵa arnalǵan jataqxanalar salynady. Oǵan respýblıkalyq bıýdjetten 153 mıllıard teńge bólinedi», - dedi E.Saǵadıev.

Osy oraıda Úkimet basshysy Baqytjan Saǵyntaev jyl sońyna deıin qansha jataqxana salynatynyn surady.

Vedomstvo basshysynyń sózine qaraǵanda, aǵymdaǵy jyldyń aıaǵyna deıin 2 jataqxana paıdalanýǵa beriledi. Al jatyn oryndardyń jalpy sany 1 500 bolady. Degenmen, Premer-Mınıstr osy saladaǵy jumystyń tym baıaý júrgizilip jatqanyn atap ótti. Negizgi sebep - qarjynyń tapshylyǵy. Máselen, kelesi jylǵa 5 myń orynǵa arnalǵan jataqxanalarǵa ǵana qarjy qarastyrylyp otyr. Osyǵan baılanysty Úkimet basshysy qarjylandyrý kólemin arttyrýdy tapsyrdy.

«Jalpy, ekonomıkadaǵy jaǵdaı turaqtalyp keledi. Erbolat Áskerbekuly (Úkimet basshysynyń orynbasary - avt.), Álıxan Asxanuly (QR Qarjy mınıstri - avt.), qosymsha qarjy kózderi kelip jatsa, bul jumysty jyldamdatýǵa kóńil bólý kerek. On jyl kútip otyrmaı, múmkindik bolsa, qarajatty birte-birte kóbeıtý qajet. Jataqxanalardyń qurylysyn jyldam bastap, jyldam aıaqtap, stýdentterimizge taratý qajet» - dedi B.Saǵyntaev.