Úkimet basshysy soltústik óńirlerdiń tynys-tirshiligimen tanysty

Úkimet basshysynyń Soltústik Qazaqstan oblysyna jumys sapary barysynda jumyspen qamtý, agroónerkásip keshenin sýbsıdııalaý jáne eńbek kóshi-qony máselelerine aıryqsha kóńil bólindi. Aldymen aýyl sharýashylyǵy kásiporyndary men eginjaı basynda bolyp, sharýalardyń jaǵdaıymen tanysqan úkimet basshysy astyqty ólkedegi «Babyq Burlyq» seriktestiginde agroónerkásip keshenin damytý máselelerine arnalǵan respýblıkalyq keńes ótkizdi. Múddeli memlekettik organdar men oblys ákimdikteriniń ókilderi, aýylsharýashylyq taýar óndirýshileri qatysqan jıynda premer-mınıstrdiń orynbasary - aýyl sharýashylyǵy mınıstri Asqar Myrzahmetov egin sharýashylyǵyndaǵy memlekettik qoldaý sharalarynyń tıimdiligin arttyrý boıynsha atqarylyp jatqan jumystar jóninde baıandady.

A.Myrzahmetov Elbasynyń kásipkerlikti keńinen damytýǵa qatysty tapsyrmasyn oryndaý sheńberinde jeke qosalqy sharýashylyq áleýetin paıdalaný maqsatynda mınıstrlik qazirgi tańda jeńildikpen nesıe berý jáne jeke qosalqy sharýashylyq kooperatıvterin sýbsıdııalaý quraldaryn ázirlep jatqandyǵyn atap ótti. Aımaqtarda jeke qosalqy sharýashylyq kooperatıvterinen kókónis ónimderin satyp alý jáne tutynýshyǵa sapaly ónim jetkizý úshin servıstik-daıyndaý ortalyqtary men ónim saqtaıtyn qoımalar júıesin qalyptastyrý qarastyrylyp jatyr. Sondaı-aq elektrondyq astyq qolhattaryn endirý ınstıtýttary qyzmeti de qarastyrylýda.

Keńestiń qorytyndysy boıynsha Kárim Másimov aýyl sharýashylyǵy mınıstrligine oblystar ákimdikterimen birlesip agroónerkásip keshenin memlekettik qoldaýdyń tıimdiligin arttyrý jóninde usynystar ázirleýdi, aýyl halqyn jumyspen qamtý, AÓK-te ónim óndirý kólemin arttyrý jáne azyq-túlik qaýipsizdigi máselelerin sheshý úshin jeke qosalqy sharýashylyq áleýetin paıdalaný baǵytyndaǵy is-sharalardy qolǵa alýdy tapsyrdy.

Sondaı-aq oblystar ákimdikterine maıly jáne jemdik daqyldardyń úlesin arttyrý arqyly egin alqaptarynyń qurylymyn ártaraptandyrý týraly memorandýmnyń oryndalýyn, egin sharýashylyǵy ónimderin qaıta óńdeý salasyn damytýǵa ınvestıtsııalar tartýdy qamtamasyz etý maqsatynda sharalar qabyldap, júzege asyrý tapsyryldy.

Úkimet basshysy sonymen qatar osy sapar barysynda «Jumyspen qamtýdyń jol kartasy - 2020» baǵdarlamasyn júzege asyrý máseleleri boıynsha keńes ótkizdi. K.Másimov sońǵy ýaqytta óńiraralyq jáne óńirlik, ıaǵnı ishki kóshi-qon kólemi ósip otyrǵandyǵyna toqtaldy. Osyǵan baılanysty halyqty el aýmaǵyna tıimdi ornalastyrý máselesi ózekti bolyp otyr. Premer-mınıstr eske salyp ótkendeı, osy rette kóshi-qon máseleleri týraly zań qabyldanyp, ishki qonys aýdarýshylar men oralmandarǵa arnap óńirlik úlestemeler engizilgen. Úkimet bıyl aqpanda eńbek kúshi jetispeıtin birneshe óńirdi aıqyndady, sonyń biri - Soltústik Qazaqstan oblysy. Bıyl elimiz boıynsha jumyspen qamtýǵa járdemdesýdiń keshendi josparlarymen 417 myńnan astam adam qamtylady. Bul turǵyda negizinen «Jumyspen qamtýdyń jol kartasy - 2020» baǵdarlamasy aıasynda atqarylatyn sharalarǵa 101 mlrd teńge bólingen.

Búgingi tańda 57 myń adam baǵdarlamaǵa qatysty. Soltústik óńirde sońǵy bes jylda Jumyspen qamtýdyń jol kartasyna 36 myń adam qatysty. Ońtústik óńirlerden oblysqa 79 otbasy kóship keldi, búginde  900-den astam otbasy kóshýge daıyn. Qazirgi ýaqytta Soltústik Qazaqstan oblysyndaǵy ekonomıkalyq belsendi halyq sany 329 myń adamdy quraıdy, onyń 313 myńy eńbekpen qamtylǵan. Bul 95 paıyzdy quraıdy.

K.Másimov aıtyp ótkendeı, oblysta JQJK - 2020 baǵdarlamasyn júzege asyrý áleýmettik problemalardy sheshýge, halyqty jumyspen qamtý jáne eńbek resýrstaryn tıimdi paıdalaný máselelerine septigin tıgizýi tıis. Otyrys sońynda Premer-mınıstr densaýlyq saqtaý jáne áleýmettik damý, ulttyq ekonomıka, aqparat jáne kommýnıkatsııa mınıstrlikterine, sondaı-aq jergilikti atqarý organdaryna birqatar naqty tapsyrmalar berdi.

Budan keıin Qostanaı oblysyna kelgen úkimet basshysy óńirdiń áleýmettik-ekonomıkalyq damý barysymen tanysty. Premer-mınıstrdiń jumys sapary Qostanaı áýejaıynyń qaýipsizdigin tekserýden bastaldy. Aıta keteıik, óńirlerge sapary barysynda K.Másimov kólik ınfraqurylymy nysandarynda, atap aıtqanda áýejaılarda qaýipsizdikti qamtamasyz etý máselelerin aıryqsha baqylaýda ustaý qajettigine basa nazar aýdardy.

Sonymen qatar, premer-mınıstr «Nurly jol» memlekettik baǵdarlamasy boıynsha salynyp jatqan shaǵyn aýdandaǵy turǵyn úı qurylysynda bolyp, birinshi kezekte jumystyń sapaly júrgizilýine mańyz berilýi kerektigin atap ótti. Memleket pen jeke ınvestorlar tarapynan turǵyn úı qurylysy salasyndaǵy belsendi saıasat qurylystyń joǵary qarqynyn saqtaýǵa múmkindik berip otyrǵandyǵyn aıta ketken jón. Oblys boıynsha bıyl búgingi kúnge deıin 89,6 myń sharshy metr turǵyn úı paıdalanýǵa berilgen. Bul - ótken jyldyń osy kezeńindegi kórsetkishpen salystyrǵanda 101,6 paıyz.
Budan ári qaladaǵy mashına jasaý zaýytynda bolyp, óndiris barysymen tanysqan Kárim Másimov eksportqa shyǵarylatyn qazaqstandyq avtokólikterdiń rýline otyryp, synap kórdi.

Premer-mınıstr Qostanaı oblysyndaǵy jumys sapary barysynda eki keńes ótkizdi. Onyń biri «Azamattarǵa arnalǵan úkimet» memlekettik korporatsııasy aıasynda halyqqa memlekettik qyzmet kórsetý máselelerine arnaldy. «Azamattarǵa arnalǵan úkimet» jumys istegeli beri aıtarlyqtaı jetistikterge qol jetkizdi. Memlekettik qyzmet isteri mınıstrligi júrgizgen zertteýlerdiń nátıjesine qaraǵanda, halyqtyń 79 paıyzy uıymnyń jumys sapasyna rıza.
Agroónerkásip keshenin damytý máselelerine arnalǵan ekinshi keńestiń kún tártibinde óńirdegi mal sharýshylyǵynyń jaǵdaıy jáne bolashaq damý múmkindikteri qaraldy. Úkimet basshysy keńes qorytyndysy boıynsha oblysta mal sharýashylyǵyn damytý jóninde jergilikti atqarý organdary men múddeli vedomstvolar basshylaryna naqty tapsyrmalar berdi.