Úkimet basshysy SQO-ny áleýmettik-ekonomıkalyq damytý jóninde keńes ótkizdi

Memleket basshysynyń tapsyrmasy boıynsha, Úkimet Soltústik Qazaqstan oblysynyń ákimdigimen birlesip, salalyq, óńirlik basymdyqtardy jáne ınvestıtsııalyq múmkindikterdi esepke ala otyryp, Soltústik Qazaqstan oblysynyń áleýmettik-ekonomıkalyq damýynyń 2018-2021 jyldarǵa arnalǵan keshendi josparyn ázirledi.

Keńesti asha otyryp, Premer-Mınıstr Keshendi jospardy iske asyrýda onyń nátıjesi men bıýdjet qarajattarynyń maqsatty ıgerilýi mańyzdy ekenin atap ótti. Negizgi másele - jospardy iske asyrýdan túsetin ekonomıkalyq tıimdilik. Sondaı-aq, B. Saǵyntaev qarasha aıynyń basynda ótetin «Qazaqstan-Reseı» aımaqaralyq forýmyna daıyndyq máselelerine toqtaldy.

«Biz qurylys barysymen tanystyq, kóńilimizden shyqty deýge bolady. Qurylys jumystary belgilengen merzimde aıaqtalady, sapasy óte jaqsy, áýejaıdan bastap barlyq nysandar boıynsha: Oqýshylar saraıy, tennıs alańy, úılerdiń qurylysy, abattandyrý jumystary - barlyǵy retimen oryndalyp jatyr. Suraǵan kólemde aqsha bólindi - qoldaý kórsetildi. Bul - oblysty damytýǵa kórsetilgen eleýli kómek. Keshendi jospar boıynsha da jumystardy jedel aıaqtaý qajet», - dedi Baqytjan Saǵyntaev.

Keshendi jospardyń negizgi baǵyttary men sharalary týraly Soltústik Qazaqstan oblysynyń ákimi Q. Aqsaqalov baıandady.

Onyń aıtýynsha, sońǵy jeti aıda óńirdiń áleýmettik-ekonomıkalyq damýynyń negizgi kórsetkishteri boıynsha oń ósimge qol jetkizilgen. Máselen, 2018 jyldyń qańtar-shilde aılarynda qysqa merzimdi ekonomıkalyq kórsetkish 107,9% qurady, qurylys jumystarynyń kólemi 1,7 esege, ınvestıtsııalar kólemi 9,9%-ǵa, aýyl sharýashylyǵy - 3,2%, ónerkásiptik óndiris - 0,3%, turǵyn úıdi paıdalanýǵa berý - 9,1% ósti. Eksport 1,3 esege ulǵaıdy.

Oblystyń ekonomıkalyq damýynyń negizgi baǵyttarynyń biri - agroónerkásip kesheni. Keshendi jospardy iske asyrý aıasynda egistik alqaptardy odan ári ártaraptandyrý sharalary jalǵasýda, 3400 basqa arnalǵan 7 sút kesheni salynady, óńdeýge jáne eksportqa basymdyqqa ıe 5000 mal ornyn quraıtyn 3 bordaqylaý alańy qurylady jáne tehnıkalyq park jańartylady.

«Nátıjesinde sút óńdeý kásiporyndarynyń júktemesi 90%-ǵa deıin, et óńdeý kásiporyndarynyń júktemesi 50% deıin artady. Bıyl oblystyń agrarshylary 34,2 mlrd teńgeden astam somaǵa 1310 birlik jańa tehnıka men jabdyqtar satyp alýdy josparlap otyr. Agroónerkásiptik keshendegi tehnıkalyq park traktorlar boıynsha 19%-ǵa, kombaındar boıynsha 22%-ǵa jańartylady. Munyń barlyǵy aýyl sharýashylyǵyndaǵy eńbek ónimdiligin 2,5 esege, al jalpy ónim kóleminiń ósimin 30 mlrd tg deıin jetkizýge jol ashady», - dedi Q. Aqsaqalov aldaǵy jumys nátıjeleri týraly málimdeı otyryp.

Osylaısha, úsh jyl ishinde Keshendi jospardyń baǵyttary boıynsha oblys ákimdigi 170 mlrd teńge jeke ınvestıtsııalardy tartýdy josparlap otyr, bul jalpy kólemniń 70%-yn quraıdy. Sonymen birge, Keshendi josparda Bıznestiń jol kartasy aıasynda jobalardy qamtýdy ulǵaıtý kózdelgen. Jalpy somasy 2,5 mlrd teńgege 284 jobany nesıeleýdi sýbsıdııalaý josparlanyp otyr.

Ákim sondaı-aq, shaǵyn jáne orta bıznes jáne tsıfrlandyrý salalaryndaǵy aldaǵy jumys josparlary, óńirdiń jylytý maýsymyna daıyndyǵy týraly baıandady.

«Barlyq jumystar josparǵa sáıkes júrgizilip jatyr. Petropavl JEO-2-de 7 týrboagregat jáne 10 qazanagregatta jóndeý jumystary aıaqtaldy. Bir qazanagregattyń jumysy 30 qyrkúıekke qaraı aıaqtalady. Stantsııadaǵy kómir qory 163 myń tonnany jáne 664 tonna mazýtty quraıdy. Áleýmettik-mádenı sala obektileri daıyn. Bıýdjettik mekemelerge arnalǵan kómir tolyǵymen jetkizildi. Halyq 214 myń tonna kómirdi jınady, bul - 56%», - dedi oblys ákimi.

Ulttyq ekonomıka mınıstri T. Súleımenov kásipkerlikti damytý jáne transfertterdi esepteý ádistemesin jetildirý týraly baıandady. Jospar halyqty jumyspen qamtýǵa, kóship qonystanǵan azamattardyń sanyn kóbeıtýge jáne memlekettik qoldaý sharalaryn usynýǵa, kásipkerlikti, agroónerkásiptik keshendi damytýǵa, ınvestıtsııalardy tartýǵa, áleýmettik jáne ınjenerlik ınfraqurylymdy damytýǵa, týrızmdi, ekologııa men qoǵamdyq tártipti qamtamasyz etýge baǵyttalǵan 48 is-sharadan turady.

«Bul qujattyń sátti iske asyrylýy óńirdegi áleýmettik-ekonomıkalyq jaǵdaıdy jaqsartýǵa, halyqtyń ketýin azaıtýǵa jáne kóshi-qon protsesin turaqtandyrýǵa, ekonomıkalyq belsendilikti yntalandyrýǵa jáne halyqtyń qolaıly ómir súrýine yqpal etetin tirshilikti qamtamasyz etetin ınfraqurylymnyń túıitkildi máselelerin sheshýge múmkindik beredi», - dedi T. Súleımenov.

JÓÓ ósimi respýblıkalyq deńgeıge jetedi jáne orta eseppen 104% quraıdy, bıznes orta jandanady jáne JÓÓ-degi shaǵyn jáne orta bıznestiń úlesi 25,8%-dan 30%-ǵa deıin artady, shaǵyn jáne orta bıznesten salyq salynatyn baza 8,5%-ǵa deıin ósedi, 14 000 shamasynda ýaqytsha jáne turaqty jumys oryndary jáne t.b. paıda bolady dep boljanǵan.

Densaýlyq saqtaý mınıstri E. Birtanov medıtsınalyq mekemelerdi salý jáne jabdyqtaý týraly aıtyp berdi. Eń aldymen, mınıstr dárigerlerdiń jumys júktemesin tómendetý, medıtsına qyzmetkerleriniń biliktiligin arttyrý, shuǵyl medıtsınalyq kómek kórsetýdi kúsheıtý, sondaı-aq medıtsınalyq jabdyqtardy satyp alý kezinde MJÁ tetikterin paıdalaný máselelerine toqtaldy.

«Jaraqattanýdyń eń joǵary kórsetkishteriniń biri Soltústik Qazaqstan oblysynda belgilengen, sol sebepti biz jedel járdemge basymdyq berdik. Eń aldymen jedel járdem standarttaryn múltiksiz atqarý, reanımobılderdi satyp alý, barlyq qyzmetkerlerdi qaıta daıarlaý jáne qabyldaý bólmeleri úshin biryńǵaı standarttardy engizý», - dedi mınıstr E. Birtanov.

Sonymen birge, E. Birtanov atap ótkendeı, Soltústik Qazaqstan oblysynyń 2018-2025 jyldarǵa arnalǵan densaýlyq saqtaý ınfraqurylymyn damytýdyń perspektıvti josparynda Petropavlda 700 orynǵa arnalǵan kópbeıindi aýrýhananyń qurylysyn júrgizý qarastyrylǵan.

Premer-Mınıstr B. Saǵyntaev densaýlyq saqtaý mınıstrine oblystyq densaýlyq saqtaý basqarmasymen birlesip, jeke keshendi jospar qabyldaýdy jáne negizgi baǵyttardy kezeń-kezeńimen aıqyndaýdy tapsyrdy.

Bilim jáne ǵylym mınıstri E. Saǵadıev bilim berý nysandaryn salý, jóndeý, tehnıkalyq jabdyqtaý, granttardy kóbeıtý, túlekterdi jumysqa ornalastyrý týraly baıandady. Onyń aıtýynsha, endigi JOO-lar jabdyqtar satyp alýmen ózderi aınalysady, mınıstrlik ár JOO-nyń naqty qajettilikterin anyqtaýǵa erkindik beredi.

«Biz qarjylyq, akademııalyq, basqarýshylyq erkindik beremiz. Granttar men aqsha tólep oqıtyndardan qarajat jınap, ózderine qajetti jabdyqty satyp alady. Olar ózderi kelisip, qajetti nárseni satyp alýy úshin qarjylyq erkindik beremiz», - dedi E. Saǵadıev.

Bilim jáne ǵylym mınıstriniń aıtýynsha, JOO jalpy oblystyń ortalyq orny bolady. Sonymen qatar, oblysta keń beıindi mamandardy daıarlaý maqsatynda Mınıstrlik bıyl pedagogıkalyq jáne medıtsınalyq mamandyqtarǵa 300 grant bóldi.

B. Saǵyntaev oqytýshylardyń biliktiligin rastaý máselesine muqııat den qoıý qajettigin atap ótti. Bilim jáne ǵylym mınıstrine TjKBB aıasynda bilim berý mekemelerimen birge jeke Jol kartasyn ázirleý tapsyryldy.

Soltústik Qazaqstan oblysyna elimizdiń azamattaryn qonystandyrý jáne olardy qoldaý tetikterin damytý jónindegi arnaıy jospardy ázirleý týraly eńbek jáne halyqty áleýmettik qorǵaý mınıstri M. Ábilqasymova baıandady. Mınıstrdiń aıtýynsha, aldaǵy úsh jylda Soltústik Qazaqstan oblysyna shamamen 3000 otbasyn kóshirý josparlanǵan.

«Ákimdik, jumys berýshi men qyzmetker arasynda 20 jylǵa úshjaqty kelisimshartqa qol qoıý kózdelgen. Qonys aýdarýshyǵa bes jyl ótkennen keıin osy turǵyn úıdi jekeshelendirip alý quqyǵy beriledi. Alǵashqy bes jylda onyń arendalyq tólem jasaýyn usynamyz. Bizdiń esebimiz boıynsha, bul - 10 000 teńgeni quraıdy, bes jyldan keıin jekeshelendirip alý quqyǵy beriledi, al kelesi 15 jylda arendalyq tólem shamamen 20 000 teńge bolady jáne ol negizgi qaryzdy óteý quny retinde eskeriletin bolady», - dedi M. Ábilqasymova.

Onyń aıtýynsha, jalpy alǵanda bul 3000 otbasyny turǵyn úımen qamtamasyz etýge múmkindik beredi. Eger ótken jyly 198 otbasy qonys aýdarsa, úsh jyl ishinde osy aımaqqa 3000 otbasyny qonys aýdartý josparlanǵan.

Qorǵanys jáne aeroǵarysh ónerkásibi mınıstri B. Atamqulov qorǵanys ónerkásibi keshenin tehnologııalyq jańǵyrtý týraly aıtyp berdi.

Budan ózge, Soltústik Qazaqstan oblysynyń bilim basqarmasynyń basshysy G. Kárimova, kásipkerlik jáne týrızm basqarmasynyń basshysy Q. Jarova jáne densaýlyq saqtaý basqarmasynyń basshysy T. Sultanǵazıev sóz sóıledi.