Úkimet basshysy Shymkenttegi áýejaı termınalynyń qurylysyn ýaqtyly aıaqtaýdy tapsyrdy
«Ózderińizge belgili, Shymkent qalasy – TMD mádenı astanasy bolyp jarııalandy. Qalaǵa keletin týrısterdiń sany birneshe esege artady. Osyǵan oraı, Indýstrııa jáne ınfraqurylymdyq damý mınıstrligi jáne ákimdik áýejaı termınalynyń qurylysyn ýaqtyly bastap, sapaly aıaqtalýyn qamtamasyz etýi kerek. Otandyq áýejaılarda sheteldik áýe kompanııalar úshin «Ashyq aspan» rejimin usyný jumysy belsendi júrgizilýi kerek. Bul, jańa sheteldik áýe kompanııalaryn tartýǵa, baǵyttardy kóbeıtýge, áýe kompanııalary arasyndaǵy básekelestikti arttyrýǵa múmkindik beredi. Al, bul, áýe bıletteri baǵasynyń tómendeýine áser etedi», - dedi Asqar Mamın búgingi Úkimet otyrysynda.
Premer-Mınıstrdiń aıtýyna qaraǵanda, bılet baǵasynyń 20 paıyzyn avıaotyn shyǵystary quraıdy.
«Sondyqtan, Ulttyq ekonomıka, Energetıka men Indýstrııa jáne ınfraqurylymdyq damý mınıstrlikterine áýe kerosınge baǵa belgileýdi, tıisti zańnamalyq retteýmen máseleni pysyqtaýdy tapsyramyz», - dedi ol.
Eske sala ketsek, búgingi Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov 2020 jyly Qazaqstanda Azamattyq avıatsııa oqý ortalyǵy ashylatynyn málimdegen bolatyn.
