Úkimet basshysy shomylý maýsymy bastalǵannan beri adamdardyń sýǵa batyp ketýiniń jıileýine alańdaýshylyq tanytty
ASTANA. QazAqparat - Aǵymdaǵy jyldyń basynan beri elimizde 198 adam sýǵa ketse, onyń 82-si balalar. Bul týraly búgin Úkimet otyrysynda QR Premer-Mınıstri Kárim Másimov aıtty.
Bizge sońǵy 1,5 aptanyń ishinde sýǵa 22 qazaqstandyqtyń batyp ketkendigi, onyń 5-eýi balalar ekendigi týraly kóptegen aqparat kelip túsýde. Osy jyldyń basynan beri 198 adam sýǵa batsa, onyń 82-si balalar eken», - dep atap ótken Úkimet basshysy elimizdiń Іshki ister mınıstri Qalmuhambet Qasymovtan mundaı qaıǵyly oqıǵalardyń aldyn alý úshin jergilikti ákimdiktermen qandaı sharalar qolǵa alynyp jatqanyn surady.
«Kárim Qajymhanuly, shynymen de jyl basynan beri bizde 198 adam sýǵa batyp ketti. Onyń 82-si balalar. Ótken jyldyń sáıkes kezeńinde 265 adam sýǵa ketken edi. ıAǵnı, tómendeý bar. Sharalar qabyldanyp jatyr. Bizde 50 myń sý qoımasy bar. Onyń tek 125-si ǵana jabdyqtalǵan, onda bizdiń qutqarýshylarymyz tur», - dedi mınıstr.
Sonymen qatar ol jergilikti ákimdiktermen mundaı qaıǵyly jaıttardyń aldyn alýǵa baǵyttalǵan sharalardyń qolǵa alynyp jatqandyǵyn, sýǵa shomylatyn jerlerdi barynsha jabdyqtaý, menshik ıelerine mindetti qutqarý beketterin ornatqyzý jumystarynyń júrgizilý ústinde ekendigin basa aıtty.
«Aqmola oblysynda óte jaqsy tájirıbe bar. Bul óńirde 6 qutqarý beketi ornatylǵan. Biraq, halyqty jumyspen qamtý ortalyqtary arqyly ákimdikter qosymsha 25 qutqarý beketin ornatady. Osy Aqmola oblysynda sýǵa ketkenderdiń sany eń tómen bolyp otyr. Dál osyndaı jaıt Aqtóbe oblysynda da oryn alǵan. Al qalǵan oblystar tıisti sharalardy qabyldaýlary qajet», - dedi Q.Qasymov.
