Úkimet basshysy ShQO-nyń jańa taǵaıyndalǵan ákiminiń aldynda qandaı mindetter turǵanyn atady

ASTANA. QazAqparat – Búgin Shyǵys Qazaqstan oblysynyń jańa taǵaıyndalǵan ákimin tanystyrǵan Úkimet basshysy Álıhan Smaılov óńir aktıvine keıingi 5 jylda oblys ornyqty damý kórsetkishterine qol jetkizgenin atap ótti.

Bul týraly QazAqparat Úkimettiń baspasóz qyzmetine silteme jasap habarlaıdy.

Máselen, jalpy óńirlik ónim kólemi 1,7 ese, jan basyna shaqqandaǵy JÓÓ 3,3 ese ósti.

«Oblysta agroónerkásiptik keshendi damytý, aýyz sýmen qamtamasyz etý, týrızmdi damytý jobalary sátti iske asyryldy. Ondaǵan áleýmettik nysandar – mektepter, sport keshenderi, aýrýhanalar, sonyń ishinde ana men bala, gematologııa, ústel tennısi ortalyqtary jáne basqa da kóptegen nysandar salyndy», - dep atap ótti Úkimet basshysy.

Sonymen qatar ol azamattardyń ál-aýqaty men ómir súrý sapasyn arttyrý, ınfraqurylymdy jańǵyrtý, óńirlik ekonomıkany damytý boıynsha jumysty jalǵastyrý mańyzdy ekenin aıtty.

Mysaly, jańa ulttyq jobalar aıasynda oblysta 4,2 myń oqýshyǵa arnalǵan 10 jaıly mektep jáne 36 alǵashqy medıtsınalyq-sanıtarlyq kómek mekemesi salynady, sondaı-aq bir aýdandyq aýrýhana jańǵyrtylady.

Sonymen qatar aýyldyq aýmaqtardy damytý tujyrymdamasy sheńberinde agrarlyq sektordy, aýyldyq ınfraqurylymdy jáne kásipkerlikti nyǵaıtý, sondaı-aq shekara mańyndaǵy aýdandarda ómir súrý deńgeıin jaqsartý jónindegi sharalar iske asyrylatyn bolady.

Budan basqa ákimdiktiń negizgi mindetteriniń qatarynda turǵyndardy aýyz sýmen jáne elektrmen úzdiksiz qamtamasyz etý, áleýmettik ınfraqurylym nysandaryn jańǵyrtý, sondaı – aq jergilikti joldardyń sapasyn arttyrý bar.

Sonymen qatar Premer-Mınıstr jylýmen jabdyqtaý máselelerin sheshý taqyrybyn qozǵady.

«Ótken qysta Rıdder JEO-da qazandyq agregattarynda 81 avarııalyq jaǵdaı tirkeldi. Qala turǵyndaryna qara sýyq túsisimen durys jylý berilgen joq. Bul problemalardy jańa jylytý maýsymy bastalǵanǵa deıin sheshý kerek. Osyǵan baılanysty oblys ákimdiginiń aldynda Rıdder JEO-ny kúrdeli jóndeýdi jáne aldaǵy jylytý maýsymynyń turaqty ótýin qamtamasyz etý mindeti tur», — dedi Álıhan Smaıylov.

Onyń aıtýynsha, aımaqtaǵy ekologııalyq ahýal da úlken alańdaýshylyq týǵyzady. Atap aıtqanda, Óskemen búginde elimizdiń ekologııalyq jaǵynan eń lastanǵan qalalarynyń qataryna kiredi. Sondyqtan zııandy qaldyqtardy azaıtý jáne tabıǵatty qorǵaý is-sharalaryna ınvestıtsııalardy ulǵaıtý úshin ónerkásiptik obektilerdi jańǵyrtý qajet.

«Abaı oblysyndaǵy sońǵy qaıǵyly oqıǵalarǵa baılanysty órt qaýipsizdigin qamtamasyz etýge erekshe nazar aýdarý kerek. ShQO-da 3 mln gektarǵa jýyq memlekettik orman qory bar, sondyqtan bul máseleniń mańyzy zor», — dep atap ótti Úkimet basshysy.