Úkimet basshysy sáýirge deıin «Doing Business» reıtınginde ındıkatorlardy jaqsartý sharalaryn pysyqtaýdy júktedi
ASTANA. QazAqparat - Búgin Úkimet otyrysynda Premer-Mınıstr Serik Ahmetov sáýirge deıin «Doing Business» reıtınginde Qazaqstan ındıkatorlaryn jaqsartý boıynsha jumystardy pysyqtaýdy tapsyrdy.
«Bes kodekske, úsh zańǵa jáne on bir zańǵa qosymsha aktige ózgerister engizemiz. Sondyqtan da bul baǵytta ýaqyt shekteýli ekenin atap ótkim keledi. Jalpy, Úkimet múshelerine Keshendi jospardyń jobasyn maquldaýdy usynamyn. Osy oraıda QR Óńirlik damý mınıstrligi men ózge de múddeli memlekettik organdarǵa úsh kúndik merzimde bekitý týraly buıryq josparyn kelisip, ony Premer-Mınıstr Keńsesine engizýdi tapsyramyn»,-dedi Úkimet basshysy.
Óz kezeginde Óńirlik damý mınıstri Bolat Jámishev qazirgi kezde atalǵan Keshendi jospardy júzege asyrý úshin zańnamalyq aktilerge barlyq ózgerister daıar turǵanyn jetkizdi.
Aıta keteıik, búgin Úkimet otyrysynda Dúnıejúzilik banktiń «Doing Business» reıtıngi ındıkatorlaryn jaqsartý jónindegi sharalardyń 2014 jylǵa arnalǵan Keshendi jospary usynyldy. Osy reıtıng aıasyndaǵy jumystyń negizgi maqsaty - ındıkatorlardyń ustanymdaryn tek qana jaqsartý emes, sonymen qatar atalǵan reıtıngti bıznesti júrgizý úshin qoldanystaǵy ákimshilik kedergilerdi anyqtaý men taldaý jáne olardy joıý jóninde qajetti sharalardy qabyldaý úshin tetik retinde paıdalaný. Mınıstrdiń aıtýynsha, 19 normatıvtik quqyqtyq akti boıynsha tizim qalyptastyrylyp, onyń aıasynda bes kodekske, úsh zańǵa, on bir zańǵa qosymsha aktilerge ózgerister eskerilgen. Osy ózgerister qabyldanǵan jaǵdaıda ekologııalyq, sanıtarlyq-epıdemıologııalyq, energetıkalyq, óndiristik qaýipsizdik salasynda keıbir protsedýralardy jeńildetýge múmkindik týady. «Reıtıngte 189 memlekettiń arasynda 50 orynda turǵan joǵary pozıtsııaǵa qaramastan, «Halyqaralyq saýda», «Qurylysqa ruqsat berý», «Energııamen qamtamasyz etý júıesine qosylý», «Nesıe alý» ındıkatorlary turǵysynda kórsetkishter tómen»,-dedi B. Jámishev.
