Úkimet basshysy S. Ahmetov Ekonomıkalyq damý jáne saýda mınıstrliginiń ujymyna jańa basshyny tanystyrdy
ASTANA. 25 qyrkúıek. QazAqparat - Búgin qyzmetine jańadan kirisken Úkimet basshysy Serik Ahmetov Ekonomıkalyq damý jáne saýda mınıstrliginde bolyp, onda ujymǵa vedomstvonyń jańa basshysy - Erbolat Dosaevty tanystyrdy.
«Men aldymen Baqytjan Ábdirulyna alǵysymdy bildirgim keledi. Aıtarlyqtaı qıyn kezeńde ol ekonomıkalyq damý jáne saýda mınıstrligin basqardy. Integratsııa, Kedendik odaq boıynsha kóp máseleler aldymyzda turǵan bolatyn. Baqytjan Ábdiruly óziniń komandasymen osy jumystardy jemisti atqara bildi», - dedi Serik Ahmetov.
Esterińizge sala keteıik, búgin Memleket basshysy Nursultan Nazarbaevtyń Jarlyǵymen Úkimettiń jańa quramy jasaqtalǵan bolatyn. Soǵan oraı mınıstrlerdiń basym bóligi óz laýazymdaryn saqtap qalǵan edi. Al Ekonomıkalyq damý jáne saýda mınıstrligine jańa basshy taǵaıyndaldy. Vedomstvonyń burynǵy basshysy Baqytjan Saǵyntaev «Nur Otan» HDP Tóraǵasynyń birinshi orynbasary qyzmetine aýysqan edi.
Toqtala ketetin jaıt, jarııalanǵan Memleket basshysynyń jarlyǵyna sáıkes, jańa Úkimettiń quramynda eki mınıstrlik basshysy áli taǵaıyndalmaǵan. Atap aıtqanda, Syrtqy ister mınıstri men eńbek jáne halyqty áleýmettik qorǵaý mınıstrlerin taǵaıyndaý keıinirek sheshiletin bolady.
