Úkimet basshysy Prezıdenttiń alǵashqy Joldaýynan beri atqarylǵan jumystardy atady

Memleket basshysy óziniń alǵashqy Qazaqstan halqyna Joldaýynda úlken saıası ózgerister týraly jarııalady. Bul pikirdi QR Premer-Mınıstri Álıhan Smaıylov «AMANAT» fraktsııasynyń keńeıtilgen otyrysynda aıtty, dep habarlaıdy QazAqparat.

«Sebebi eldiń qoǵamdyq-saıası ómirin jańǵyrtpaıynsha, ekonomıkalyq reformalardy júrgizý múmkin bolmaıtyn edi.

Azamattyq qoǵamdy damytý tujyrymdamasy iske asyrylýda.

Bul qujat demokratııany nyǵaıtýdyń jańa kezeńi jáne kóppartııalyqty damytý men básekeli saılaýdy ótkizý jolyndaǵy alǵashqy qadam boldy», - dedi Úkimet basshysy.

Ol Prezıdent janyndaǵy Ulttyq qoǵamdyq senim keńesiniń jumysyn jalǵastyrý úshin jalpyulttyq deńgeıde Ulttyq quryltaı qurylǵanyn eske saldy.

«Beıbit jınalystardy uıymdastyrý men ótkizýdiń jańa tártibi zańnama deńgeıinde retteldi.

Alǵash ret zań júzinde sybaılas jemqorlyq qylmys oryn alǵan memlekettik organ basshysynyń jaýapkershiligi bekitildi.

Ákimshilik rásimdik-protsestik kodeks qabyldandy. Ol azamattar men bıznestiń múddesin qorǵaýdy qamtamasyz etedi.

Zań júzinde azamattardyń quqyqtaryn qorǵaý kepildigi artyp, qylmystyq protseste taraptardyń saıyskerligi jáne teńdigi qamtamasyz etildi.

Alǵash ret memlekettik organdar úshin azamattardyń ótinishterimen jumys isteýine arnalǵan biryńǵaı aqparattyq júıe engizildi», - dedi Álıhan Smaıylov.

Premer-Mınıstr aýdandyq mańyzy bar qalalar, aýyldar, kentter jáne aýyldyq okrýgter ákimderin saılaý ınstıtýty engizilgenin atap ótti. Onyń aıasynda 1576 aýyl ákimi saılandy.

«Jer kodeksine tıisti túzetýler engizý arqyly sheteldikterge jáne sheteldik zańdy tulǵalarǵa aýyl sharýashylyǵy jerlerin berýge túpkilikti tyıym salyndy.

«Halyq únine qulaq asatyn memleket» tujyrymdamasyn iske asyrý aıasynda Úkimet «Qoǵamdyq baqylaý týraly» zań ázirledi. Ol memlekettik organdar men uıymdardyń qoǵam aldyndaǵy ashyqtyǵyn jáne eseptiligin arttyrady», - dedi ol.