Úkimet basshysy: Pedagog–qoǵamdaǵy asa mańyzdy, qasterli mamandyqtardyń biri
«Pedagog – talmaı ter tógýdi talap etetin, qoǵamdaǵy asa mańyzdy, qasterli mamandyqtardyń biri. Muǵalimniń eren eńbegi el bolashaǵy – jas urpaqtyń adamgershilik qundylyqtary men memlekettiń zııatkerlik jáne ekonomıkalyq áleýetiniń qalyptasýyna tikeleı yqpalyn tıgizedi.
Búgingideı kúrdeli kezeńde muǵalimderdiń bizdiń qoǵamnyń tynys-tirshiligindegi teńdessiz máni men aýqymdy róli aıqyn kórinis berip otyr. Ásirese, qazirgi jaǵdaıda ustazdar qaýymy el kelesheginiń tizginin ustaıtyn óskeleń urpaqty zor yjdaǵattylyqpen bilim nárimen sýsyndatýdy jalǵastyra otyryp, úlken jaýapkershilikti kóterýdiń jáne boryshyn adal óteýdiń joǵarǵy úlgisin kórsetip, az ýaqyt ishinde oqytýdyń jańa formatyna beıimdelip úlgerdi.
Qurmetti ustazdar, eleýli eńbekterińiz úshin shyn júrekten alǵys aıtamyz. Sizderge myqty densaýlyq, ıgilik pen tabys tileımiz!», - delingen quttyqtaý mátininde.
Aıta ketsek, qazan aıynyń alǵashqy jeksenbisinde Qazaqstanda muǵalimderdiń kásibı merekesi atap ótiledi.
Bul ataýly kún 1965 jyly 29 qyrkúıekte KSRO Joǵarǵy Keńesi Prezıdıýmynyń Buıryǵymen belgilengen. Búgingi tańda Qazaqstan, Belarýs, Latvııa jáne Ýkraına Muǵalimder kúnin qazannyń alǵashqy jeksenbisinde atap ótedi. Al kórshiles Ózbekstan – 1 qazanda, Qyrǵyzstan, Ázerbaıjan, Reseı, Tájikstan, Armenııa, Moldavııa, Estonııa jáne Lıtva – ustazdar merekesin 5 qazan kúnine bekitken.
