Úkimet basshysy Pavlodar oblysynyń ákimine: Másele baqylaýdan shyǵyp ketken be
ASTANA. QazAqparat - Búgin Úkimettiń selektorlyq rejimdegi otyrysynda QR Premer-Mınıstri Baqytjan Saǵyntaev Pavlodar oblysynyń ákimi Bolat Baqaýovqa turǵyn úıledi paıdalanýǵa berýdegi kemshilikterdi joıýdy tapsyrdy, dep habarlaıdy QazAqparat tilshisi.
Pavlodar oblysynyń ákimi Bolat Baqaýovtyń aıtýynsha, 8 aıdyń qorytyndysy boıynsha óńirde 2 kórsetkishti qospaǵanda barlyq ındıkatordyń oń dınamıkasy saqtalýda. Qurylys salasynda «Eýrazııalyq energetıkalyq korporatsııasy» AQ besinshi energoblokty qaıta jańartý boıynsha qurylys-montajdaý jumystaryn kesheýildetýine oraı qurylys jumystarynyń kórsetkishi 3,6 paıyzǵa tómendegen.
«Turǵyn úıdi paıdalanýǵa berý qarqyny 12,7 paıyzǵa tómendedi. Bul taǵy da «EEK» korporatsııasynyń qarajaty esebinen salynyp jatqan 5 úıdiń, atap aıtqanda Pavlodarda - 1, Ekibastuzda - 1, Aqsýda 3 úı paıdalanýǵa berý merziminiń birneshe ret aýysýymen baılanysty. Munan basqa úı qurylysy kombınaty salyp jatqan 2 bıýdjettik úı boıynsha artta qalý bar. 9 aıdyń qorytyndysy boıynsha bul kórsetkishterdi túzeımiz», - dedi Bolat Baqaýov.
«Bolat Jumabekuly, Siz ylǵı másele meniń jeke baqylaýymda deısiz. Bul joly aıtpaı qaldyńyz. Baqylaýdan shyǵyp ketken ǵoı deımin. EEK kináli, taǵy bireý kináli, bıýdjetti salǵan kináli bolyp jatyr. Sonda Siz ne isteısiz? 9 aıdyń qorytyndysynda ózgeris bolmasa ne isteımiz? Jaýapkershilik kimde bolady?»,- dedi óz kezeginde Úkimet basshysy.
Osy rette Pavlodar oblysynyń ákimi jaýapkershilikti óz moınyna alatyndyǵyn aıtyp sendirdi.
