Úkimet basshysy: Pavlodar oblysyndaǵy basym mindetterdiń biri – ınfraqurylymdy jańǵyrtý

PAVLODAR. QazAqparat – Oblys aktıvimen ótken kezdesýde Premer-Mınıstr Álıhan Smaıylov óńir basshylyǵynyń aldynda turǵan basym mindetterdiń biri ınfraqurylymdy jańǵyrtý ekenin atap ótti. Bul týraly QazAqparat Úkimettiń telegram kanalyna silteme jasap habarlaıdy.

Qazir jylytý maýsymy júrip jatyr. Ókinishke qaraı, Ekibastuz qalasynyń jylý jelilerinde apat bolyp, turǵyndar jylýsyz qalǵan edi. Aıanbaı jumys istegen mamandardyń arqasynda jylý berý qalpyna keltirildi. Qazirgi kezde apattyń sebepteri anyqtalyp jatyr, nátıjesi shyqqan soń kináliler jaýapqa tartylady. Ákimdik bul máseleni erekshe nazarǵa alyp, jylytý maýsymynyń qalypty jaǵdaıda ótýin qamtamasyz etýi kerek, -

dedi Álıhan Smaıylov.

Úkimet basshysy iri óndiris oshaqtarynyń jumysyna baılanysty óńirdegi ekologııalyq ahýal kúrdeli ekenine nazar aýdardy. Respýblıka boıynsha shyǵaryndylardyń jalpy kóleminiń shamamen 30%-y Pavlodar oblysyna tıesili. Osyǵan baılanysty oblys basshylyǵy zııandy óndiristik shyǵaryndylardyń qorshaǵan ortaǵa teris áserin azaıtý jónindegi jumysqa den qoıýy qajet.

Sonymen qatar, kásiporyndar óndiristik protsesti jańǵyrtýǵa, ınvestıtsııalardy ulǵaıtýǵa, jumyskerlerge áleýmettik qoldaý kórsetýge kóńil bólýi tıis, -

dedi Álıhan Smaıylov.

Foto: t.me/Kzgovernment