Úkimet basshysy: Otandyq taýarlardy xalyqaralyq elektrondy saýda alańdaryna shyǵarý qajet
NUR-SULTAN. QazAqparat - QR Premer-Mınıstri Asqar Mamın tórt mınıstrlikke eksportty damytý boıynsha arnaıy jol kartalaryn ázirleýdi tapsyrdy, dep xabarlaıdy QazAqparat tilshisi.
«Bizdiń ónimderimiz basqa elderde tanymal bolýy tıis ári ortaq eksporttyq brendti qurý arqyly eksportty damytý qajet. Aýyl ónerkásibi kesheni salasynda osy jumys uıymdastyrylǵan. Endi, olardy syrtqy naryqtarǵa qarqyndy túrde shyǵarý qajet. Ol úshin otandyq óndirýshiler óndiretin taýarlardyń sapasyn joǵarylatyp, eksportqa shyǵarylatyn elderdiń talaptaryna sáıkestigin qamtamasyz etý kerek. Sondyqtan Indýstrııa jáne ınfraqurylymdyq damý mınıstrligi múddeli memlekettik organdarmen birge xalyqaralyq deńgeıge saı qazaqstandyq standarttardy ázirlep, reglamentterdi engizýi qajet», - dedi A.Mamın mınıstrler kabınetiniń búgingi otyrysynda.
Úkimet basshysynyń aıtýynsha, zamanaýı zertxanalyq bazany da qurý qajet. Osynyń arqasynda bıznes óz taýarlaryna tıisti kýálikterdi alady.
«Eksportqa baǵdarlanǵan taýarlardy xalyqaralyq elektrondy saýda alańdary arqyly satý máselesin de qarastyrǵan jón. Al ulttyq ekonomıka, ındýstrııa jáne ınfraqurylymdyq damý, aýyl sharýashylyǵy jáne syrtqy ister mınıstrlikterine bir aıdyń ishinde barlyq salalar boıynsha eksportty damytý jáne kórsetiletin qyzmetterdiń basymdy sektorlary boıynsha jol kartalaryn ázirleýdi tapsyramyn», - dep atap kórsetti A.Mamın.
Aıta keteıik, Úkimettiń búgingi otyrysynda QR Premer-Mınıstri Asqar Mamın negizgi kapıtalǵa salynatyn ınvestıtsııalar boıynsha jumysty kúsheıtýdi tapsyrdy.
Aldaǵy ýaqytta Úkimet sheteldik ınvestıtsııalardy tartýdyń jańa tásilderin talqylaıdy.
Al «Samuryq-Qazyna» qorynyń basshysy Axmetjan Esimov shetelde qordyń aktıvterine toqtam salý máselesin kóterdi.
