Úkimet basshysy orynbasarlaryna Jalpyulttyq jospardyń oryndalýyn qatań baqylaýǵa alýdy tapsyrdy
ASTANA. 25 jeltoqsan. QazAqparat - Úkimet basshysy óziniń orynbasarlaryna 2050 jylǵa deıingi jańa Strategııany
júzege asyrý turǵysyndaǵy Jalpyulttyq jospardyń oryndalýyn qatań baqylaýǵa alýdy tapsyrdy. Mundaı tapsyrmany Premer-Mınıstr Serik Ahmetov búgin Úkimet otyrysynda júktedi.
«Qazirgi ýaqytta Úkimettiń, atqarýshy organdardyń barsha jumysy 2050 jylǵa deıingi elimizdiń damýynyń jańa Strategııasyn júzege asyrýǵa baǵyttalady. Osy qujatty júzege asyrý boıynsha Jalpyulttyq jospardy bekitý turǵysynda Memleket basshysy Jarlyqqa qol qoıdy. Osy oraıda memlekettik organdardyń, óńir ákimderiniń maqsaty ony mindetti túrde oryndaýǵa negizdeledi»,-dedi ol.
«Sondyqtan Premer-Mınıstrdiń orynbasarlaryna ózderiniń baǵyttary boıynsha qatań baqylaý jasap, Jalpyulttyq jospardyń oryndalý monıtorıngin uıymdastyrýdy tapsyramyn»,-dedi S. Ahmetov.
