Úkimet basshysy ormandaǵy órt jóninde: Tehnıka men adamdardy kóbirek jiberý kerek edi
«Men buǵan deıin órt keńinen taramaı turyp, bastalǵan sátte, ony sóndirý úshin shuǵyl áreket etý kerektigin eskertken bolatynmen. Órttiń taralýyna jol bermeý úshin tehnıka men adamdardy kóbirek jiberý kerek edi. Dalada nemese ormanda órt shyqqan birinshi kúni alǵashqy saǵattarda tıisti qadamdardy qabyldaý óte mańyzdy. Mundaıda jaǵdaıdy durys baǵalap, kez kelgen apattyń aldyn alýǵa barlyq kúsh-jigerdi jumsaý kerek. Sonda ǵana shyǵyn azaıyp, adam ólimi men aýqymdy apattan aman qalýǵa bolady», - dedi Úkimet basshysy.
Osy oraıda Premer-Mınıstr Ekologııa mınıstrligi Tótenshe jaǵdaılar mınıstrligimen birlesip, eldiń ulttyq parkteri men orman sharýshylyqtaryn tilsiz jaýdy erte anyqtaý jáne monıtorıng júıelerimen jaraqtandyrý jóninde is-sharalar qabyldaýy kerektigin aıtty.
«Tótenshe jaǵdaılar mınıstrligi múddeli memlekettik organdarmen birge tabıǵı órtterge qarsy áreket etý algorıtmin qaıta qaraýy qajet. Eń bastysy, jalyndy tolyqtaı aýyzdyqtap, óshirý kerek. Memleket basshysynyń barlyq tapsyrmalary oryndalýy tıis», - dedi Álıhan Smaıylov.
