Úkimet basshysy normatıvtik-quqyqtyq aktilerdi memlekettik tilge aýdaratyn lıngvıstıkalyq ortalyq qurýdy pysyqtaýdy tapsyrdy
ASTANA. Qańtardyń 16-sy. QazAqparat /Ernur Aqanbaı/ - Úkimet basshysy Kárim Másimov Premer-Mınıstrdiń Keńsesine jáne Ádilet mınıstrligine normatıvtik-quqyqtyq aktilerdi jáne halyqaralyq kelisimderdi memlekettik tilge aýdaratyn birtutas mamandandyrylǵan lıngvıstıkalyq ortalyq qurýdy pysyqtaýdy tapsyrdy.
Ol bul tapsyrmany Ádilet mınıstrliginiń búgingi alqa májilisinde berdi, dep habarlaıdy QazAqparat.
«Mundaı ortalyq bizge qajet. Sebebi bizdiń til qazir damyp keledi. Bir termındi, ásirese jańa sózderdi árbir lıngvıst maman óz betinshe aýdaryp keledi. Keı-keıde Ádilet mınıstrliginiń aýdarmasyn Premer-Mınıstr Keńsesimen, Parlamentpen, Prezıdent Ákimshiligimen kelisý qıyn dúnıe», dedi alqada Úkimet basshysy.
Onyń aıtýynsha, áriptes elderdiń jáne bizdiń memlekettiń aýdarmashylarynyń daýlasýynyń nátıjesinde gaz qubyrynyń qurylysyna qatysty kelisimdi bir jyl boıy Parlament arqyly ótkizý qıyn bolǵan. «Árıne, bul bizdiń damýymyzdy, sonyń ishinde bizdiń ulttyq tilimizdiń damýyn tejeıdi», dedi Úkimet basshysy.
Aıta keteıik, mundaı ortalyqty qurý týraly usynysty búgingi alqa májilisinde QR Parlamenti Májilisiniń depýtaty Rahmet Muqashev aıtty.
