Úkimet basshysy: Mınıstrler men ákimder «Bıýdjetti basqarý» tásilinen «nátıjelerdi basqarý» tásiline kóshýi kerek
ASTANA. QazAqparat – Qarjy mınıstrligi úshin bıýdjettiń kiris bóligin arttyrý mańyzdy mindettiń bir bolyp qala beredi. QR Premer-Mınıstri Álıhan Smaıylov Qarjy vedomstvonyń keńeıtilgen alqa májilisinde osyndaı mindetter qoıdy, dep habarlaıdy QazAqparat tilshisi.
«Bıýdjet protsesin jaqsartyp, jeńildetý – mańyzdy júıelik mindet bolyp otyr. Bıýdjet júıesiniń ashyqtyǵyn arttyrý qajet. Memlekettik josparlaýdy bıýdjet shyǵystaryna naqty baılanystyrý kerek.
Tıimdilikti arttyryp, tıimsiz shyǵystardy qysqartý úshin bıýdjettik baǵdarlamalar ákimshileriniń qarjylyq tártibin kúsheıtý qajet», - dedi Premer-Mınıstr.
Onyń aıtýyna qaraǵanda bul máselede birinshi basshylardyń jaýapkershiligi mańyzdy.
«Ortalyq jáne jergilikti atqarýshy organdardyń birinshi basshylarynyń úlken jedel derbestigin qamtamasyz etý, eń úlken áleýmettik-ekonomıkalyq nátıje alý maqsatynda bıýdjet qarajatyn tıimdi ıgerý jáne bólý úshin olardyń jaýapkershiligin arttyrý qajet.
Negizgi maqsat – «bıýdjet qarajatyn basqarýdan» «nátıjelerdi basqarýǵa» kóshý. Bıýdjet shyǵystarynyń tıimdiligi men ekonomıkalyq qaıtarymyn avtomattandyrý jáne tsıfrlandyrý esebinen de arttyrý qajet. Munyń bárin jańa Bıýdjet kodeksi sheńberinde qarastyrý qajet», - dedi Álıhan Smaıylov.
