Úkimet basshysy men qyzmetkerleri «Qazaqstan halqyna» qoryna bir kúndik eńbekaqylaryn aýdardy

NUR-SULTAN. QazAqparat - Memleket basshysy Qasym-Jomart Kemeluly Toqaevtyń bıylǵy 11 qańtarda QR Parlamenti Májilisiniń otyrysynda bergen tapsyrmasyn oryndaý aıasynda Qazaqstannyń birneshe qoǵamdyq uıymy «Qazaqstan halqyna» qoǵamdyq áleýmettik qoryn (QÁQ) qurdy.

Qordyń quryltaıshylary «Qazaqstan halqyna» QÁQ tóraǵasy qyzmetine memleket qaıratkeri, belgili qarjyger Bolat Jámishevti saılady.

Baqylaýshylar keńesine densaýlyq saqtaý men bilim berý salalarynyń belgili qaıratkerleri, sondaı-aq QR qoǵamdyq birlestikteriniń ókilderi kirdi. «Qazaqstan halqyna» QÁQ densaýlyq saqtaý, bilim berý, halyqtyń áleýmettik jaǵynan az qamtylǵan toptaryn áleýmettik qoldaý salasyndaǵy naqty problemalardy sheshýmen aınalysatyn bolady. Qordyń qyzmeti qoǵamdy biriktirýge jáne áleýmettik ádilettilikti nyǵaıtýǵa yqpal etedi. Qor jeke jáne memlekettik kózderden qarjylandyrylady, sonymen qatar halyqaralyq qaıyrymdylyq uıymdarynyń kómegin tartý josparda bar. QR Úkimetiniń basshysy Á. Smaıylov pen QR Premer-Mınıstri Keńsesiniń qyzmetkerleri bir kúndik eńbekaqylaryn «Qazaqstan halqyna» qoryna aýdardy. Úkimet bıznes ókilderin, eń aldymen, iri bıznesti áleýmettik jaýapkershilik tanytyp, Qordy qarjylandyrýǵa kómek kórsetýge shaqyrady.