Úkimet basshysy men Densaýlyq saqtaý mınıstri medıtsına qyzmetkerlerin kásibı merekelerimen quttyqtady
ASTANA. QazAqparat - Astanada Beıbitshilik jáne kelisim saraıynda medıtsına qyzmetkerleriniń kúnine oraı merekelik kontsert ótti. Onda QR Premer-Mınıstri Kárim Másimovtiń quttyqtaýyn onyń orynbasary Gúlshara Ábdiqalyqova oqyp berdi.
«Qazaqstan qazirgi zaman jaǵdaıyndaǵy damýynda ekonomıkalyq jáne áleýmettik progrestiń negizgi kórsetkishi retinde densaýlyq saqtaý salasyna úlken mańyz berip keledi. Bul sala ekonomıkanyń eleýli bóligi, halyqtyń áleýmettik ál-aýqatynyń basty ındıkatory bolyp tabylady. Jaqsy densaýlyq ekonomıkalyq damýdyń irgetasy dep qaraǵan jón. Búginde elimizde dıagnostıka men emdeýdiń zamanaýı tehnologııalary ıgerilýde: eń ozyq klınıkalar salynýda, medıtsınalyq bilim berý júıesi jańǵyrtylýda.
Adamdardyń ómiri men densaýlyǵyna degen jaýapkershilik, joǵary bilim men úlken kásibılik tájirıbelerińiz barsha qoǵamnyń turaqty damýyna úlken negiz berýde.
Qurmetti medıtsına qyzmetkerleri, kásibı merekelerińizben shyn júrekten quttyqtaımyn! Arasha túsken ómirler úshin sizderge izgi nıetti rızashylyǵymdy bildirgim keledi. Jumysta sáttilik, myqty densaýlyq, uzaq ómir tileımin», - delingen Úkimet basshysynyń quttyqtaý sózinde.
QR Premer-Mınıstriniń orynbasary Gúlshara Ábdiqalyqovanyń aıtýynsha, qazaqstandyqtardyń densaýlyǵyn jaqsartý - Elbasy saıasatynyń basym baǵyttarynyń biri. Elimizde densaýlyq saqtaý salasyn damytýǵa barlyq jaǵdaılar jasalýda.
Odan ile sóz alǵan Qazaqstannyń Densaýlyq saqtaý mınıstri Salıdat Qaıyrbekova, barlyq áriptesterin quttyqtap, birqatar úzdik medıtsına qyzmetkerlerin «Eren eńbegi úshin», «Úzdik qyzmetker» tósbelgilerimen marapattady.
«Bizdiń jumysymyzǵa qarap, barsha halyq memleketimizdiń qyzmet kórsetý salasyn baǵalaıdy. Sondyqtan bizdiń moınymyzdaǵy jaýapkershilikti isti abyroımen atqarýdy suraımyn. Biz mınıstrden bastap, shalǵaıdaǵy qarapaıym akýsherlik qyzmetkerlerge deıin óz isiniń jetik mamany retinde joǵary sapaly qyzmet kórsetýge tıispiz», - dedi ol.
Merekelik shara barysynda Lakı Kesoglý, «Kesh you» toby syndy otandyq estrada juldyzdary ónerlerin pash etti.
