Úkimet basshysy memorgandardyń ınternet resýrstarynyń biryńǵaı platformasyn qurýdy júktedi

NUR-SULTAN. QazAqparat – Asqar Mamınniń aıtýynsha, memlekettik organdardyń ınternet resýrstarynyń biryńǵaı platformasyn qurý – memorgan saıttaryn biriktirýge jol ashady, dep habarlaıdy QazAqparat tilshisi.

«Elektrondy úkimet» portalynda memlekettik qyzmetterdi turaqty túrde kórsetý – basym mindetterdiń biri. Alaıda bıyl memlekettik organdardyń júıeleriniń isten shyǵýyna shamamen 130 ret jol berilgen. Buǵan azamattar tarapynan eleýli syn aıtyldy. Ondaı jaǵdaılardyń basym bóligi ІІM, Eńbek jáne halyqty áleýmettik qorǵaý mınıstrliginde, Quqyqtyq statıstıka komıtetinde kezdesedi. Vedomstvolyq júıelerdiń turaqty jumys isteýin baqylap, monıtorıngti kórsetý maqsatynda jaýapty basshylarǵa osy máselege jetekshilik etetin orynbasardy derbes jaýapty etýdi tapsyramyn», - dedi Asqar Mamın Úkimet otyrysynda.

Úkimet basshysy sonymen birge, memlekettik organdardyń ınternet resýrstarynyń biryńǵaı platformasyn qurý – memorgan saıttaryn biriktirý múmkindigin beretinin atap ótti.

«Bul shara der kezinde qolǵa alynyp otyr. Sondyqtan, barlyq ortalyq memlekettik organǵa bıylǵy jyldyń sońyna deıin biryńǵaı platformaǵa kóshýdi tapsyramyn», - dedi Asqar Mamın.