Úkimet basshysy Qyzylorda oblysyn damytý boıynsha basym mindetterdi belgiledi
Oblystaǵy aǵymdaǵy jaǵdaı týraly óńir ákimi Nurlybek Nálibaev baıandama jasady. Onyń habarlaýynsha, osy jyldyń 11 aıynda negizgi makroekonomıkalyq kórsetkishterdiń ósý qarqyny joǵary boldy. Atap aıtqanda, óńdeý ónerkásibiniń kólemi 8,5%-ǵa, jumys istep turǵan shaǵyn jáne orta kásipkerlik sýbektileriniń sany 29,5%-ǵa, al ınvestıtsııalar tartý qarqyny 31,3%-ǵa ulǵaıdy. Oblysta 28 myńnan astam jańa jumys orny ashyldy, 366 km avtojol jóndeldi jáne 604 myń sharshy metr turǵyn úı salyndy.
Óńirdegi agroónerkásiptik keshenniń ósý qarqyny týraly aýyl sharýashylyǵy mınıstri Erbol Qarashókeev baıandady. Sondaı-aq keńeste bilim berý, densaýlyq saqtaý, ónerkásip, jol ınfraqurylymy, turǵyn úı-kommýnaldyq sharýashylyǵy salalaryn, oblysty elektrmen, jylýmen jáne gazben jabdyqtaý júıelerin damytý, qorshaǵan ortany qorǵaý jónindegi sharalar qaraldy.
Premer-Mınıstr QR Prezıdentiniń saılaýaldy baǵdarlamasyn iske asyrý boıynsha Іs-qımyl josparynda óńirlik damý máselelerine, onyń ishinde olardyń derbestigin arttyrýǵa jáne óńirlik dısproportsııany tómendetýge basa nazar aýdarylǵanyn atap ótti.
«Іs-sharalardyń barlyǵy qazaqstandyqtardyń ómir súrý sapasy men ál-aýqatyn jaqsartýǵa baǵyttalyp otyr», — dedi Álıhan Smaıylov.
Onyń aıtýynsha, bıyl bekitilgen ulttyq jobalar aıasynda oblysta 2026 jylǵa deıin 15 myńnan astam oqýshyǵa arnalǵan jańadan 21 mektep, bastapqy medıtsınalyq-sanıtarlyq kómek kórsetýge arnalǵan 27 obekt salynyp, 4 aýdandyq aýrýhanany jańǵyrtý josparlanǵan. Odan bólek, aýyldyq jerlerge keletin medıtsına mamandaryn áleýmettik qoldaý máseleleri sheshiledi.
Premer-Mınıstr Qyzylorda oblysynyń áleýmettik-ekonomıkalyq damýynyń úsh jyldyq Keshendi josparyn iske asyrý aıaqtalyp qalǵanyn eske saldy. Sonyń arqasynda halyqty gazdandyrý jáne sýmen qamtamasyz etý deńgeıi, turǵyn úı qurylysynyń qarqyny jáne basqa da negizgi makroekonomıkalyq kórsetkishter artty. Jalpy óńirlik ónim kólemi nomınaldy mánde 279 mlrd teńgege ósti, oblys ekonomıkasyna shamamen 1,5 trln teńge ınvestıtsııa tartyldy. Bul rette jospardyń 25 is-sharasy oryndalmaı qaldy.
Sonymen qatar Álıhan Smaıylov óńir ekonomıkasyn ártaraptandyrýdy jalǵastyrý qajettigin atap ótti. Bıyl oblysta jeke ınvestıtsııalar esebinen quny 6,5 mlrd teńge bolatyn 7 jobany aıaqtaý josparlanýda. 1 trln teńgeden astam somaǵa taǵy 60-qa jýyq joba iske asyrylyp jatyr.
«Oblys ákimdigi olardyń barlyǵyn ýaqytyly iske qosyp, josparlanǵan jobalardyń sapaly pysyqtalýyn qamtamasyz etýi qajet», — dedi ol.
Sonymen qatar Álıhan Smaıylov azyq-túlik taýarlarynyń baǵasyn ustap turý, oblys turǵyndaryn jylýmen, elektrmen jáne sýmen qamtamasyz etý boıynsha jumystyń tıimdiligin arttyrý qajettigin atap ótti.
Premer-Mınıstr Soltústik Aral teńiziniń jaǵdaıyna erekshe nazar aýdardy. Onyń kólemi sońǵy jyldary azaıyp barady. Osyǵan baılanysty ol sýarý tehnologııalary men kezektiligin ustanýdy jáne kollektorlyq-drenajdy sýlardy qaıta paıdalanýdy, sý únemdeý tehnologııalaryn engizý jumystaryn jalǵastyrýdy, jerlerdiń melıoratıvtik jaǵdaıyna monıtorıng jasaýdy kúsheıtýdi, kanaldardyń jóndeý jumystaryn júrgizýdi, sýarý jelisiniń magıstraldyq jáne sharýashylyq arnalaryn tazartýdy qamtamasyz etýdi tapsyrdy.
Qorytyndylaı kele, Álıhan Smaıylov 2023 jyldyń 1-shi toqsanynyń aıaǵyna deıin ekologııalyq tólemderdi eskere otyryp, kommýnaldyq sektor kásiporyndary qyzmetkerleriniń jalaqysyn arttyrý boıynsha sharalar qabyldaýdy, 2025 jyldyń sońyna deıin Qyzylorda-Jezqazǵan avtomobıl jolynyń jergilikti ýchaskelerin qaıta jańǵyrtý boıynsha jumystardy aıaqtaýdy jáne oblystyq joldardyń normatıvtik jaǵdaıyn 95%-ǵa jetkizýdi, kaltsıılendirilgen soda óndiretin zaýyttyń qurylys jobasyn odan ári júzege asyrý úshin ınvestor tartý máselesin pysyqtaýdy, sondaı-aq «Qaraózek» sý qoımasynyń qurylysyn bastaýǵa respýblıkalyq bıýdjetten qarjy bólý múmkindigin qarastyrýdy tapsyrdy.
Bul rette Premer-Mınıstr gazdyń resýrstyq bazasynyń bolýyn eskere otyryp, oblystyń eldi mekenderin gazdandyrýdy jalǵastyrý jáne Qyzylorda qalasynda perınataldyq ortalyq salýǵa jobalaý-smetalyq qujattama ázirleýdi jedeldetý qajettigin atap ótti.
Oblysqa jumys sapary aıasynda Álıhan Smaıylov S. Ysqaqov atyndaǵy Qyzylorda qurylys jáne bıznes kolledjiniń jáne múmkindigi shekteýli balalarǵa mamandandyrylǵan kómek kórsetetin «Qamqorlyq» ońaltý ortalyǵynyń jumysymen tanysty.
Foto: primeminister.kz
