Úkimet basshysy Qytaı naryǵyna shyǵýdyń jolyn kórsetti
Úkimet basshysynyń aıtýynsha, búginde memleket tarapynan eksportty uıymdastyrý boıynsha barlyq sharalar atqarylyp keledi. Endi, bıznestiń ózi áreket etýi kerek.
"Máselen, men Qytaıda bolǵanda qazaqstandyq taýarlarǵa suranys ber dedi. Biraq ol taýarlardyń qaptamasy sáıkes kelmeıdi eken. Qytaı jaqta tutynýshylar qaptamany jyltyraq kúıinde me, basqa bir túrde me, bir sózben aıtqanda qaptamaǵa qatysty ózderiniń naqty bir talaptary bar. Al bizdiń kásipkerlerimiz ony jasamaıdy. Sodan Qytaı naryǵyna shyǵa almaı júresizder. Negizi, osy máseleni birlesip sheshý kerek tárizdi. Biz óz tarapymyzdan qoldaý jasaýǵa daıarmyz", - dedi B.Saǵyntaev "Atameken" UKP Prezıdıýmynyń keńeıtilgen otyrysynda.
Premer-Mınıstriniń oıynsha, naqty bir brendti jasaýǵa bolady. Ol arqyly sheteldiń naryǵyna shyǵýǵa bolady.
Aıta keteıik, otyrys kezinde Baqytjan Saǵyntaev kásipkerlerdi kórshi Qytaı arqyly Ońtústik Azııa elderine shyǵýǵa úndedi.
"Qazir barlyq naryqtar ashylyp jatyr. Ásirese, Qytaıdyń úlken naryǵyn erekshe atap ótken jón. Qytaı úkimeti tarapynan da usynystar boldy. Olar birlesken kásiporyndardy qurý arqyly qazaqstandyq ónimderdi basqa elderge jetkizýge bolady deıdi. Bul degenimiz, otandyq kásipkerler qytaılyq áriptesterimen birlesip, Qytaı arqyly Ońtústik Azııaǵa shyǵa alady. Abylaı Isabekuly (Atamekenniń basqarma tóraǵasy - avt.), osy máseleni jaqsy biledi. Sondyqtan osy múmkindikti sátti paıdalanamyz degen úmit bar", - dep atap kórsetti B.Saǵyntaev.