Úkimet basshysy kúshtik qurylymdardy reformalaý boıynsha tapsyrmalar berdi
«Kúshtik qurylymdar blogy boıynsha. Birinshi, Іshki ister jáne Tótenshe jaǵdaılar mınıstrlikteri quqyq qorǵaý júıesin reformalaý sheńberindegi jumysty jalǵastyrsyn.
Ekinshi, Іshki ister mınıstrligi Ulttyq ekonomıka jáne Qarjy mınıstrligimen birlesip, Ulttyq ulan men ІІM arnaıy maqsattaǵy bólimshelerin sandyq jáne sapalyq nyǵaıtý boıynsha usynystardy pysyqtap, bir apta merziminde Úkimetke engizsin. Úshinshi Іshki ister mınıstrligi múddeli memlekettik organdarmen birlesip, polıtsııa qyzmetkerlerin quqyqtyq qorǵaýdy jaqsartý máselesin belgilengen tártippen pysyqtasyn. Qarý aınalymy men dinı eksremızımniń taralýyna qarsy baqylaýdy kúsheıtsin», - dedi ol Úkimet otyrysynda.
Sonymen qatar Premer-Mınıstr tótenshe jaǵdaı qyzmetiniń jumysyn da jetildirý kerektigin atady.
«Tórtinshi, Tótenshe jaǵdaılar mınıstrligi Ulttyq ekonomıka jáne Qarjy mınıstrlikterimen birlesip, azamattyq qorǵaý organdaryn materıaldyq-tehnıkalyq jáne áleýmettik jaǵynan kúsheıtý boıynsha usynystardy pysyqtap, bir apta merzimde Úkimetke engizsin.
Besinshi, Tótenshe jaǵdaılar mınıstrligi múddeli memlekettik organdarmen birlesip, belgilengen tártippen eldiń azamattyq qorǵanys josparyna qajetti túzetýler engizsin jáne tótenshe jaǵdaı kezeńinde memlekettik materıaldyq rezervten materıaldyq qundylyqtardy shyǵarýdy jetildirý boıynsha kelisilgen usynystar ázirlesin», - dedi Álıhan Smaıylov.
