Úkimet basshysy qurylys materıaldary baǵasynyń sharyqtaý sebebin anyqtaýdy tapsyrdy
ASTANA. 14 mamyr. QazAqparat - Búgin Úkimet otyrysynda Premer-Mınıstr Serik Ahmetov Tabıǵı monopolııalardy retteý agenttigine negizgi qurylys materıaldarynyń baǵasyna monıtorıng júrgizýdi tapsyrdy.
Tsement, metall syndy qurylysqa qajetti negizgi materıaldardyń baǵasy sharyqtap otyrǵandyǵyn atap ótken Úkimet basshysy: «Bul jerde Básekelestikti qorǵaý agenttigi bir aıdyń ishinde metall 10-12 myń teńgege, al tsement 5-6 myń teńgege qandaı negizde qymbattaǵandyǵyn jiti qadaǵalaýy tıis. Bul kásiporyndarda ne oryn aldy, nelikten baǵanyń mundaı kúrt kóterilýi tirkelip otyr?», - dedi.
Sonymen qatar S.Ahmetov naryqtaǵy ahýalǵa baılanysty mundaı áreketterge baryp otyrǵandyqtaryn atap ótti. «Men olardyń osy kezeń ishinde qyzmetkerleriniń jalaqysyn 30-40 paıyz kóterdi dep oılamaımyn. Biz bul máseleni jyl saıyn kóteremiz ári jyl saıyn ony agenttik aldyna júktep beremiz. Nege olardyń ózderi naýryz aıynan bastap bul máselege monıtorıng júrgizbeıdi», - dep keıidi Premer-Mınıstr.
