Úkimet basshysy Qostanaıda MJÁ jobalaryn iske asyrýdyń tıimdiligin tekserdi
ASTANA. QazAqparat - Baqytjan Saǵyntaev Qostanaı oblysyna jumys sapary aıasynda «Jemchýjına Stomed Ýralskaıa» jańa kópbeıindi medıtsınalyq ortalyǵyna baryp, óńirdegi memlekettik-jekemenshik áriptestik (MJÁ) jobalaryn iske asyrý barysymen tanysty, dep habarlaıdy primeminister.kz.
QR Premer-Mınıstrine tsıfrlyq rentgen júıesi, beıne-endoskopııalyq jabdyqtar, ýltradybystyq dıagnostıka júıesi qoldanylatyn klınıkanyń jabdyqtalý jumystary tanystyryldy.
Medortalyq MJÁ tetikterin qoldanýmen júzege asyrylǵan joba bolyp tabylady, jáne densaýlyq saqtaýdy damytýdyń 2016-2019 jyldarǵa arnalǵan «Densaýlyq» memlekettik baǵdarlamasynyń «jekemenshik medıtsınany damytý negizinde alǵashqy medıtsınalyq-sanıtarlyq kómek jelisin keńeıtý» basymdyqty baǵytyna engizilgen.
Saǵyntaevqa memleket tarapynan MJÁ tetikterin iske asyrý aıasynda kommýnıkatsııalardy retteýge kómek kórsetilip jatqandyǵy baıandaldy. Atap aıtqanda, medortalyqqa aparar jol jóndeldi, avtobýs pavılony ornatyldy, turǵyndarǵa yńǵaıly bolý úshin qala avtobýstarynyń qozǵalys baǵdarlary qaıta qaraldy.
2016-2017 jyldary Qostanaı oblysynda densaýlyq saqtaý salasynda eki MJÁ jobasy iske asyryldy, oǵan qosa aǵymdaǵy jyldyń sońyna deıin Rýdnyı qalasynda jáne Zatobol aýylynda emhanalar salý boıynsha eki jobany iske asyrý josparlanǵan.
QR Úkimeti bıyl memlekettik-jekemenshik áriptestigin damytý úshin bekitý men jobalardyń saraptama merzimderin qysqartý jumystaryn júrgizdi, túrli salalarǵa arnalǵan MJÁ jobalary boıynsha tıptik qujattama ázirlendi, sondaı-aq ınvestorlarǵa arnalǵan jobalardyń biryńǵaı bazasy ázirlenýde.
