Úkimet basshysy Kólik mınıstrine eskertý jasady
ASTANA. 1 shilde. QazAqparat - Búgin taýar naryqtarynda básekelestikti qorǵaý júıesin jetildirý máselesi talqylanǵan Úkimet otyrysynda QR Premer-Mınıstri Serik Ahmetov uıaly baılanys tarıfine qatysty Kólik jáne kommýnıkatsııa mınıstri Asqar Jumaǵalıevke eskertý jasady.
Eske salsaq, básekelestikti qorǵaý agenttiginiń tóraǵasy Bolatbek Qýandyqov baıandama barysynda Qazaqstanda ınterkonnekt tarıfteri asa joǵary ekenin, «munyń uıaly baılanystyń túpki qunyna áser etetinin» aıtqan bolatyn.
«Meniń oıymsha, agenttik tóraǵasy ınterkonnekt máselesin tolyq bile bermeıdi, Kólik jáne kommýnıkatsııa mınıstrligi buǵan deıin ınterkonnekttegi joǵary tarıf týraly másele kóterip, saraptamanyń qajettiligin aıtqan edi. Sosyn biz halyqaralyq kompanııaǵa saraptama jasattyq, qazirdiń ózinde tarıfterge ońtaıly áser etýde», - degendi alǵa tartady mınıstr A. Jumaǵalıev. Onyń aıtýynsha, jalpylama ınterkonnekt boıynsha jumys júrip jatyr.
«Sonda biz qashanǵa deıin barlyq halyqaralyq saraptamalyq kompanııalardy shaqyra beremiz? Áli de tarıfterge baǵanyń tómendeıtinin kútemiz be? Bizde eń joǵary tarıf ekenimen kelisesiz be?», - dep surady Úkimet basshysy Serik Ahmetov.
Al mınıstr A. Jumaǵalıev bunymen kelispeıtinin aıtyp: «BUU málimetteri boıynsha 46-oryndamyz. Jalpy tarıf jaǵdaıy jetkilikti túrde ońtaıly», - dedi.
«Biz tek sońǵy jyldary ǵana tarıfti tómendetip kelemiz. Siz ne aıtyp tursyz? Kcell tarıfi qandaı ekenin bilmeıdi deısiz be? Básekelestik jónindegi agenttik tóraǵasynyń tarıfti tómendetý týraly daýlary - bul fakt. Osymen aınalysyńyzdar. Kólik jáne kommýnıkatsııa mınıstrine eskertý jasaımyn! Baqytjan Ábdiruly, osymen aınalysyńyz!», - dedi óz kezeginde Premer-Mınıstr S. Ahmetov.
