Úkimet basshysy Kóksaraı sý qoımasy boıynsha tapsyrma berdi

ASTANA. QazAqparat – Túrkistan oblysynyń ákimi Darhan Satybaldy óńirdiń sý tasqynyna daıyndyǵy týraly málimet bere otyryp, Kóksaraı sý qoımasyndaǵy jaǵdaıǵa alańdaýshylyq bildirdi, dep habarlaıdy QazAqparat tilshisi.

«Túrkistan oblysynda byltyr sý tasqynyna qarsy sharalardy iske asyrýǵa arnalǵan jol kartasyna múldem qarjy bólingen joq. Al aqpan aıynda sizderdi sý basyp qala jazdady Qaýipti aldyn alý úshin qandaı jumystar júrgizilip jatyr», - dep surady Premer-Mınıstr Úkimet otyrysynda ákimnen (Túrkistan oblysynyń ákimi Darhan Satybaldy – avt.).

Oblys ákiminiń aıtýynsha, Kóksaraı sý rettegishine sý jınaýdy toqtatý qajet.

«Qazirgi ýaqytta Shardara sý qoımasyndaǵy sý kólemi 100 paıyzǵa jaqyndap qaldy. Al Syrdarııa ózeniniń tómengi aǵysyndaǵy Kósaraı sý rettegishiniń syıymdylyǵy – 3 mlrd tekshe metr. Degenmen de, 2022 jyly Kóksaıra dambysynyń tehnıkalyq jaı-kúıin zertteý barysynda 1,8 mlrd tekshe metrden artyq sý jınaý múmkindigi joq ekeni anyqtaldy. Qazirgi tańda jınalǵan sý kólemi bul deńgeıden 22 mln metr asyp otyr. Qazirdiń ózinde qorǵanys bógetindegi yza sýdyń shyǵýy kóbeıip, bógettiń tómengi jaǵynan sýdyń qummen shyǵýy baıqalyp otyr. Osyǵan oraı kóktemde yqtımal sý tasqynyn qabyldaý úshin qoımany toltyrýdy toqtatyp, artyq sýdy bosatýdy usynamyz», - dedi oblys ákimi.

Úkimet basshysy Ekologııa jáne tabıǵı resýrstar mınıstrligine atalǵan sharýany pysyqtap, jyldam sheshim qabyldaýdy tapsyrdy.