Úkimet basshysy Qazaqstannyń tamaq ónimderin satý úshin Reseıde saýda jelilerin satyp alýdy usyndy
ASTANA. Qarashanyń 17-si. QazAqparat /Ernur Aqanbaı/ - Búgin Úkimet otyrysynda Premer-Mınıstr Kárim Másimov Reseıdiń iri qalalaryndaǵy saýda jelilerin satyp alý arqyly Qazaqstannyń tamaq jáne et ónimderin syrtqy naryqta satýdy usyndy,
dep habarlaıdy QazAqparat.
«Reseıdiń iri qalalarynda, máselen 10 mln. halqy bar Máskeýde jaqsy-jaqsy saýda jelileriniń baryn bilemiz. Myna daǵdarys jaǵdaıynda múmkin olardyń quny arzandaǵan bolar. Bular Qazaqstannyń tamaq jáne et ónimderin satý úshin áleýetti naryq bola alady. Bul jerde ónimderdi reseılik áriptesterge satý máselesin ǵana emes, saýda jelilerdi satyp alý máselesin oılastyrý qajet», dedi Úkimet basshysy birinshi orynbasary Ó. Shókeevke qaratyp aıtqan sózinde.
Osy oraıda Premer-Mınıstr bul isti Qazaqstan damý bankiniń qarjysy arqyly dóńgeletýge bolatynyn atap ótti. «Alaıda, buny bıznes múmkindiginshe ózi istegeni jón. Qandaı da bir jelini satyp alsa, bizde áleýetti naryq paıda bolady», dedi ol. «Aldymyzǵa mynadaı maqsat qoıalyq: bızneske bir jelini satyp alýǵa kómekteseıik, sol arqyly óz ónimderimizdi sata bastaıyq», dep tujyrymdady sózin K. Másimov.
