Úkimet basshysy Kaspıı portynyń eksporttyq áleýetin arttyrýdy tapsyrdy

NUR-SULTAN. QazAqparat - Mańǵystaý oblysyna jumys sapary barysynda Úkimet basshysy óńir turǵyndaryn sýmen jabdyqtaıtyn mańyzdy kózderdiń biri «Kaspıı» tuşylandyrý zaýytyna bardy, dep habarlaıdy QR Úkimetiniń baspasóz qyzmeti.

Búgingi tańda zaýytta keńeıtý jobasy aıasynda qurylys-montajdaý jumystary júrgizilip jatyr, bul táýligine sýdyń ónimdiligin 40 myń tekshe metrge deıin arttyrýǵa múmkindik beredi. Jumystardy osy jyldyń sońyna deıin aıaqtaý josparlanyp otyr.

«Sýmen jabdyqtaý – aımaq úshin, ásirese jazǵy kezeńde, eń ózekti máselelerdiń biri. Jyldan jylǵa tuşytqysh qondyrǵylar qýatynyń jetispeýshiligi seziledi. Osyǵan baılanysty Úkimet zaýyttyń ónimdiligin eki ese arttyrý úshin ony jańǵyrtýǵa 12 mlrd teńgeden astam qarajat bóldi. Bul másele Memleket basshysynyń baqylaýyna alynǵan. Barlyq jumysty sapaly ári ýaqytynda júrgizý qajet», — dedi Premer-Mınıstr.

Sodan keıin Álıhan Smaıylov Qazaqstandaǵy ammıak jáne ammıak selıtrasyn óndiretin jalǵyz kásiporyn – «QazAzot» AQ-ǵa baryp, onda jańa beıtaraptandyrý jáne býlandyrý bólimshesin iske qosý rásimine qatysty.

Premer-Mınıstr Úkimet elimizdiń ónerkásiptik damýyn yntalandyrý boıynsha keshendi sharalar qabyldap jatqanyn aıtty.

Sondaı-aq Premer-Mınıstr jumys sapary barysynda Kaspıı teńiziniń shyǵys jaǵalaýynda birneshe halyqaralyq kólik dálizderiniń qıylysý núktesinde ornalasqan Aqtaý teńiz saýda portyna bardy.

«Mańǵystaý oblysynyń halyqaralyq mańyzy bar, aýqymdy kólik-logıstıkalyq jáne ınfraqurylymdyq-servıstik áleýeti zor. Alaıda elimizdiń teńiz porttarynyń múmkindikteri tolyq paıdalanylmaıdy, al júkteme orta eseppen 21%-dy ǵana quraıdy. Bul jaǵdaıdy ózgertý qajet. Indýstrııa jáne ınfraqurylymdyq damý mınıstrligi «Qazaqstan temir joly» AQ-men birlesip, Transkaspıı halyqaralyq kólik baǵyty boıynsha eksporttyq júkterdi baǵyttaý arqyly Aqtaý jáne Quryq teńiz porttarynyń júktemesin ulǵaıtý máselesin pysyqtaýy qajet», — dedi Álıhan Smaıylov.