Úkimet basshysy Qarjy mınıstrligine 2014 jyldyń sońyna deıin «Qazynashylyq-klıent» aqparattyq júıesin óńirlerde engizýdi tapsyrdy

Osy rette ol óziniń orynbasary Qaırat Kelimbetovke atalǵan júıeni engizý isine barlyq jaǵdaı jasaý kerektigin basa aıtty.

«Men sizdiń aýdandyq, múmkin aýyldyq eldi mekenderge deıingi memlekettik mekemelerdi «Qazynashylyq-klıent» júıesimen qyzmet kórsetý isine qosýdy jedeldetýińizdi qoldaımyn», - dedi S.Ahmetov Qarjy mınıstrine qarata. - Egerde siz, qarjylandyrý jaǵdaıyn eskere otyryp, muny 2014 jyldyń sońyna deıin jasaıtyn bolsańyz, onda Úkimet tolyǵymen qoldaý kórsetedi».

Aıta keteıik, alqa májilisinde Bolat Jámishev 2012 jyly memlekettik mekemelermen ózara is-qımyldyń tıimdiligin arttyrý úshin jáne aýdannan tómen ákimshilik deńgeıde qazynashylyq bólimshelerin qurmaı-aq jergilikti ózin-ózi basqarý organdaryna qashyqtan qyzmet kórsetýdi qamtamasyz etýdiń mańyzdy quraly retinde «Qazynashylyq-klıent» aqparattyq júıesin damytý jalǵasqanyn atap ótken edi.