Úkimet basshysy Kárim Másimov oblystardy aralaýdy josparlap otyr
ASTANA. QazAqparat - Úkimet basshysy Kárim Másimov oblystardy aralaýdy josparlap otyr. Búgin QR Parlamenti Palatalarynyń birlesken otyrysynda QR Premer-Mınıstri Kárim Másimov osylaı málimdedi. Eske sala keteıik, birlesken otyrysta Úkimettiń byltyrǵy jylǵy bıýdjettiń atqarylýy týraly esebi talqylanǵan bolatyn.
Parlament Úkimet esebin bekitken soń Premer-Mınıstr depýtattyq korpýsqa syndarly talqylaý men usynystary úshin alǵysyn aıtty. «Men sizdermen qoıan-qoltyq jumys isteýge ýáde bergenmin. Biz qazir solaı jumys istep te jatyrmyz. Al búgin kóterilgen suraqtardy aldaǵy ýaqytta Úkimettiń otyrysynda egjeı-tegjeıli qarap, talqylaıtyn bolamyz», - dedi Kárim Másimov.
Sonymen qatar, Úkimet basshysy kúzge qaraı aǵymdaǵy bıýdjetti naqtylaý men aldaǵy úsh jylǵa arnalǵan bıýdjet jobasyn qalyptastyrý barysynda naqty máseleler boıynsha suraqtarǵa jaýap bolatynyn jetkizdi.
«Bıylǵy jazda men 2012 jyldaǵy sekildi barlyq oblystardy aralaǵym keledi. Onda jergilikti jerlerde oryn alyp otyrǵan naqty máselelerge nazar aýdarǵandy jón sanaımyn. Osy oblystyq saparlarymda sizderdiń taraptaryńyzdan syndarly usynystar jasalsa ony óńirlerde talqylaý durys bolatyn edi dep sanaımyn», - dep túıindedi Úkimet basshysy óz sózin.
