Úkimet basshysy Qaraǵandy oblysynyń ákimine Prıozersk ákimin ornynan alý týraly tapsyrma berdi
ASTANA. 17 qańtar. QazAqparat - Búgin Qazaqstan Respýblıkasynyń Premer-Mınıstri Kárim Másimov Qaraǵandy oblysynyń Prıozersk qalasyndaǵy jaǵdaıǵa baılanysty úkimettik komıssııa músheleriniń baıandamasyn tyńdady, dep habarlaıdy Úkimet basshysynyń baspasóz qyzmeti.
Premer-Mınıstr Qaraǵandy oblysynyń ákimi Serik Ahmetovke jylý berý nysandaryn daıyndaý jumystaryn óz deńgeıinde uıymdastyrylmaǵany, jylý kózderiniń jumysyna baqylaýdyń joqtyǵy jáne apatty jaǵdaıdy boldyrmaýǵa sharalar qoldanbaǵany úshin Prıozersk qalasynyń ákimi Qaırat Smaǵulovty qyzmetinen alyp tastaý týraly tapsyrma berdi.
Jylytý maýsymyn júrgizýge daıyndyq pen ony ótkerý kezinde jibergen qatelikteri jáne der kezinde shara qoldanbaǵany úshin Qaraǵandy oblysy ákiminiń orynbasary Baýyrjan Smaǵulovqa jáne oblystyq Energetıka jáne kommýnaldyq sharýashylyq basqarmasynyń bastyǵy Marat Mádıevke qatań sógis jarııalandy.
Prıozerskidegi jaǵdaı men qalanyń jylýmen qamtamasyz etilýi eldiń Premer-Mınıstri K.Másimovtiń tikeleı baqylaýynda tur.
