Úkimet basshysy qantqa eń tómengi bólshek saýda baǵasyn belgileý máselesin pysyqtaýdy tapsyrdy

NUR-SULTAN. QazAqparat – Búgin Úkimet otyrysynda Premer-Mınıstr Álıhan Smaıylov Pavlodar oblysynda jańa qant zaýytyn salý máselesin pysyqtaýdy tapsyrdy, dep habarlaıdy QazAqparat tilshisi.

«Aýyl sharýashylyǵy mınıstrligi Saýda mınıstrligimen, «Báıterek» holdıngimen birlesip, qant zaýyttaryn jańǵyrtý jáne shıkizat satyp alýǵa aınalym qarajatyn tolyqtyrý úshin jeńildikpen nesıe berý máselesin pysyqtasyn. Sonymen qatar, zaýyttarǵa ónimdi satý baǵasynyń kúrt ósýine jol bermeý boıynsha qarsy mindettemeler belgileý kerek», - dep tapsyrdy Álıhan Smaıylov.

Munymen qosa, Úkimet basshysy Pavlodar oblysynda jańa qant zaýytyn salý máselesin pysyqtaýdy júktedi. Bul turǵyda Aýyl sharýashylyǵy mınıstrligi Pavlodar oblysynyń ákimdigimen, «Báıterek» holdıngimen birlesip, óńirde qant qyzylshasy óndirisiniń kólemin keńeıtý sharalaryn qabyldaıdy.

«Saýda mınıstrligine ishki naryqty dempıngten qorǵaý úshin qantqa eń tómengi bólshek saýda baǵasyn belgileý máselesin pysyqtaýdy tapsyramyn», - dedi Premer-Mınıstr.

Budan buryn habarlanǵandaı, Álıhan Smaılov qant baǵasyna qatysty qajetsiz deldaldardy anyqtaýdy tapsyrdy.

QR Aýyl sharýashylyǵy vıtse-mınıstri Ábilqaıyr Tamabek Qazaqstandaǵy qanttyń 58% shetelden jetkiziletinin aıtty.

Foto: primeminister.kz