Úkimet basshysy qandaı aýylǵa keńjolaqty Internet tartylatyndyǵyn aıtty

ASTANA. QazAqparat - Qazaqstannyń árbir aýylyna keńjolaqty Internet tartýǵa qarajatymyz jetpeıdi. Bul týraly búgin «Digital Bridge» halyqaralyq ınnovatsııalyq forýmda QR Premer-Mınıstri Baqytjan Saǵyntaev aıtty, dep habarlaıdy QazAqparat tilshisi.

«Bizde de úlken problema bar. Aýmaǵymyz óte úlken, jer kólemi boıynsha álemde 9-shi elmiz. Halyq sany óte az, shashyrańqy qonystanǵan. Qazaqstanda 7 myńdaı eldi meken bar. Eger biz olardyń árqaısysyna keńjolaqty Internet jetkizetin bolsaq, onda oǵan aqshamyz jetpeıtin edi. Sońǵy aýylǵa jetkizgenimizshe tehnologııa da ózgerip ketýi múmkin. Qajeti de bolmaı qalýy yqtımal», - dedi QR Úkimet basshysy.

Osy oraıda Premer-Mınıstr aýyldarǵa Internet jetkizýdiń ózge jolyn tańdaǵanyn basa aıtty.

«Biz tirek aýyldardy damytatyn bolamyz. Bizde olardyń sany myńnan asyp jyǵylady. Olar eń birinshi kezekte damytylyp, eń aldymen keńjolaqty Internetke qol jetkizetin bolady. Jumysty bastap ta kettik, 2021 jyly aıaqtaımyz. Bizdiń osyndaı aýqymdy mindetimiz bar, ony jyldam sheshýimiz qajet», - dedi Baqytjan Saǵyntaev.

 

Aıta keteıik, forýmnyń tsıfrlyq ekonomıkany damytýdyń jahandyq trendteri talqylanǵan jalpy otyrysyna qatysqan Premer-Mınıstr «Digital Bridge» úlken baılanystar jasalatyn alańǵa aınalatyndyǵyn

Qazaqstan tek qana tsıfrlyq kún tártippen ómir súrip jatqanyn aıtqan edi.

Digital Bridge - Qazaqstandaǵy bıylǵy jyly ótip otyrǵan basty ınnovatsııalyq oqıǵa.