Úkimet basshysy "Qalamger-Azamat" jas tilshiler forýmyna qatysýshylarǵa quttyqtaý joldady
ALMATY. 5 tamyz. QazAqparat /Erlik Erjanuly/ - QR Premer-Mınıstri Kárim Másimov tamyzdyń 16-18 kúnderi ótetin IV respýblıkalyq "Qalamger-Azamat" jas tilshiler forýmyna qatysýshylarǵa joldaǵan quttyqtaýynda: «Qalamdaryńyz qarymdy, jazǵan týyndylaryńyz taǵylymdy bolsyn!», - dep lebiz bildirgen.
Bul quttyqtaýdy búgin sharanyń uıymdastyrýshylary Almatyda ótkizgen baspasóz máslıhatynda oqyp berdi.
"Elimizdiń túrli BAQ-darynda qalam tartyp júrgen jasósprimderdiń shyǵarmashylyqtaryn damytýda "Qalamger-Azamat" forýmynyń alar orny erekshe. Osyndaı ıgi bastamalardyń nátıjesinde bolashaq jýrnalısterdiń shyǵarmashylyq tynysy keńeıip, qoǵamǵa degen ózindik kózqarasy qalyptasatynyna, sondaı-aq tanymdyq qabiletteri arta túsetinine senimim mol", - deıdi Kárim Qajymuqanuly. "Ónerlige óris keń" degen halyq danalyǵyn tilge tıek etken Úkimet basshysynyń bul hatynyń mátinimen "Zańǵar" shyǵarmashylyq birlestiginiń tóraǵasy Aıdar Qyryqbaı tanystyrdy. Onda: "Bilim - tuńǵıyq teńiz, óner - sarqylmas baılyq. Ultymyzdyń bolashaǵy da, mádenıeti men ádebıetiniń keleshegi de Sizderdiń qabilet-qarymdaryńyzben astasyp jatyr. Táýelsiz elimizdiń tálimdi urpaǵyn qalyptastyrýda ózderińizdeı jas órenderdiń orny bólek, júkteler jaýapkershilik te joǵary. Bul jıyndy uıymdastyrýdaǵy basty maqsat - bulaqtyń kózin ashyp, balaýsa daryndy shyńdaý, eliniń bolashaǵy úshin qyzmet etetin patrıot azamat tárbıeleý",- degen QR Premer-Mınıstri Kárim Másimov.
