Úkimet basshysy K. Másimov Polsha halqyna qaıǵyly qazaǵa baılanysty kóńil aıtty
áýirdiń 12-ci. QazAqparat /Qanat Mámetqazyuly/ - Búgin QR Premer-Mınıstri Kárim Másimov Astanadaǵy Polsha Elshiliginde bolyp, onda sáýirdiń 10-ynda Smolensk mańynda oryn alǵan apatqa baılanysty Polsha halqyna kóńil aıtty.
Esterińizge sala keteıik, sol kúni ushaq apaty saldarynan atalǵan el Prezıdenti Leh Kachınskıı jáne onyń jubaıy, sondaı-aq birqatar polıak azamattary qazaǵa ushyraǵan bolatyn, dep habarlaıdy QazAqparat.
«Qazaqstan Memleket Basshysy jáne Qazaqstan Úkimeti atynan biz polıak halqyna kóńil aıtamyz jáne polıak halqynda bundaı qasiretti eńserý úshin kúsh-jiger bolady dep sanaımyz ári Polsha budan keıingi damýynda osyǵan deıin tańdap alǵan jolmen júredi degen senimdemiz», dedi K. Másimov.
Sonymen birge, Úkimet basshysy kóńil aıtý kitabyna jazba qaldyryp, onda búkil álem halqy polıak halqymen birge qaıǵyratynyn, jáne polıak Prezıdenti men onyń janyndaǵy tulǵalardyń qazasyn Ekinshi dúnıejúzilik soǵystan keıingi úlken qasiret dep sanaýǵa bolatynyn atap kórsetti.
