Úkimet basshysy K.Másimov Doing Business jyldyq reıtıngisindegi Qazaqstan kórsetkishterin jaqsartýǵa tapsyrma berdi
TANA. 15 qarasha. QazAqparat /Marlan Jıembaı/ - Úkimet basshysy Kárim Másimov Doing Business (bıznes júrgizý) jyldyq reıtıngisindegi Qazaqstan kórsetkishterin jaqsartý boıynsha memlekettik organdarǵa birqatar tapsyrma berdi.
Atalǵan másele boıynsha negizgi baıandama jasaǵan QR Premer-Mınıstriniń orynbasary Erbol Orynbaevtyń atap ótýinshe, bıznes reıtıngi 11 ustanym boıynsha 183 eldegi bıznes ahýaldy baǵalap, bıznes júrgizýdiń jeńildigin anyqtaǵan. Osy reıtıngte elimiz 47 orynǵa turaqtap, 11 ustanymǵa kóterilgen. «Máselen, ınvestorlardy qorǵaý ındıkatory boıynsha Qazaqstan 34 ustanymǵa kóterildi. Al salyq salý ındıkatory boıynsha Qazaqstan ustanymy 2 jyl boıy edáýir kóterilýde», - dep atap ótken E.Orynbaevtyń aıtýynsha, elimizdiń qurylys jáne halyqaralyq saýda ındıkatorlary mardymsyz kórsetkishke ıe bolyp otyr.
Osy oraıda Úkimet basshysy: «Birinshi bólim boıynsha Ómirzaq Estaıulyna Qurylys jáne turǵyn úı kommýnaldyq sharýashylyǵy agenttigi bazasynda top qurýdy tapsyramyn. Bul salada túbegeıli sharalar júrgizýimiz kerek. Qurylys boıynsha tizimniń sońynda turǵanymyz biz úshin uıattaý», - dedi.
Ekinshi másele halyqaralyq saýdaǵa qatysty ekendigin atap ótken ol Ekonomıkalyq damý jáne saýda mınıstrligine usynys ázirleýdi tapsyrdy. Sonymen qatar Premer-Mınıstr elimizdiń Qarjy mınıstri Bolat Jámishevke elektrondyq deklaratsııalaýǵa tezirek ótý úshin jumystardy jandandyrýdy tapsyrdy.
