Úkimet basshysy halyqty qysqamerzimdi oqytýmen qamtýdy tapsyrdy

NUR-SULTAN. QazAqparat – QR Premer-Mınıstri Álıhan Smaıylov halyqty qysqamerzimdi oqytýmen qamtý jáne kásiptik bilimi bar kadrlardy daıarlaýdy ulǵaıtýdy tapsyrdy, dep habarlaıdy QazAqparat.

«Memleket, kásiporyndar men oqý oryndarynyń arasyndaǵy jaýapkershilik anyq bólingende ǵana kadr daıarlaýdyń sapasy qamtamasyz etiledi. Muny álemdik tájirıbe de anyq kórsetip otyr. Sondyqtan, ákimdikter kolledjder men kásiporyndardyń ózara tıimdi áriptestik ornatýy úshin sharalar qabyldaýy qajet. ıAǵnı, kolledjderdi qamqorlyqqa alý, dýaldi oqytý júıesin damytýǵa jaǵdaı jasalýy tıis. Mamandardy aldyn ala daıarlaý úshin «Jańa kásipter atlasyn» da paıdalanǵan jón», - dedi Á. Smaıylov Úkimet otyrysynda.

Eń bastysy – kolledjder men ýnıversıtetterdiń túlekteri eńbek naryǵynda suranysqa ıe bolýy kerek.

«Kadr daıarlaýda mamandarǵa degen qazirgi suranyspen qatar, eńbek naryǵynyń boljamdy derekteri de negizge alynýǵa tıis.

Bul mindetterdiń barlyǵy 2025 jylǵa deıingi bilim berýdi damytý tujyrymdamasynda eskerilýi kerek. Sonymen qatar, Eńbek mınıstrligi múddeli memlekettik organdarmen, ákimdiktermen jáne «Atameken» palatasymen birlesip, qysqamerzimdi oqytýdy ulǵaıtý máselesin pysyqtap, onyń tıimdiligine monıtorıng júrgizýdi qamtamasyz etsin», - dedi Álıhan Smaıylov.

Odan bólek, óńir ákimdikterine tehnıkalyq jáne kásiptik bilimi bar kadrlardy daıarlaýǵa jergilikti bıýdjetten bólinetin memlekettik bilim berý tapsyrysyn ulǵaıtý, «Jas maman» jobasynyń negizinde kolledjderdi jaraqtandyrýǵa qarajat bólý, kásiporyndarmen birge mamandardy nysanaly túrde daıarlaýdy jolǵa qoıý tapsyrmalary berildi.

Buǵan deıin QR Bilim jáne ǵylym mınıstri Ashat Aımaǵambetov Qazaqstanda 406 kásiporyn 406 kolledjdi óz qamqorlyǵyna alǵanyn aıtqan edi.

Qazaqstanda ekonomıkaǵa qajetti mamandyqtardyń óńirlik kartalary jasalady jáne 2 mln astam jańa jumys orny qurylady.

Sonymen birge, elimizde 2 jylda maman ázirleıtin «Qoldanbaly bakalavrıat» pılottyq jobasy bastalady.