Úkimet basshysy Eýropalyq Odaq ókildiginiń basshysymen kezdesý ótkizdi
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev Qazaqstandaǵy Eýropalyq Odaq ókildiginiń basshysy Traıan Hrısteamen kezdesti, dep habarlaıdy QazAqparat primeminister.kz silteme jasap.
Kezdesý barysynda Qazaqstan men Eýropalyq Odaq arasyndaǵy keńeıtilgen áriptestik jáne yntymaqtastyq týraly kelisimdi iske asyrý, saýda-ekonomıkalyq ózara is-qımyldy keńeıtý jáne sheteldik ınvestıtsııalardy tartý máseleleri talqylandy.
Aıta keterligi, Qazaqstannyń Eýropalyq Odaqpen saýda-ekonomıkalyq baılanystary joǵary deńgeıde saqtalyp otyr. Eýroodaq Qazaqstannyń negizgi saýda jáne ınvestıtsııalyq seriktesi. Onyń úlesine QR-dyń syrtqy saýda aınalymynyń 50% jáne el ekonomıkasyna tartylǵan sheteldik kapıtaldyń jartysynan astamy tıesili.
2018 jyldyń qańtar-naýryz aılarynda Qazaqstannyń EO elderimen syrtqy saýda aınalymy $9 mlrd qurady (2017 jyldyń qańtar-naýryz aılarynda - $6,8 mlrd). 2017 jylǵy qańtardan jeltoqsan aıyna deıin bul kórsetkish $30 mlrd qurady (eksport - $24,2 mlrd, ımport - $5,7 mlrd), bul $60,2 mlrd kólemindegi QR-nyń syrtqy saýdasynyń jalpy kóleminiń 49,8% quraıdy.
2017 jyly Eýropalyq Odaqtan tartylǵan tikeleı shetel ınvestıtsııalarynyń jalpy aǵyny jalpy $20,7 mlrd-tyń $9,8 mlrd qurady. Negizgi ınvestor elder: Nıderlandy ($4,4 mlrd), Belgııa ($960,6 mln), Frantsııa ($595,3 mln), Ulybrıtanııa ($418,8 mln), Germanııa ($280,8 mln) jáne Lıýksembýrg ($276, 8 mln).
Qazaqstan men EO elderiniń arasyndaǵy taýar aınalymy 2018 jyldyń qańtar-aqpan aılarynda $5,5 mlrd qurady, bul ótken jyldyń osyndaı merzimimen salystyrǵanda 32,6%-ke joǵary ($4,2 mlrd) kórsetkish.
