Úkimet basshysy: Etnıkalyq qazaqtardy qonystandyrýdyń jańa tásilderin ázirleý qajet

ASTANA. QazAqparat – Etnıkalyq qazaqtar úshin «bir tereze» qaǵıdatyn engizý qajet. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Demografııalyq jáne ekonomıkalyq úrdisterdi eskere otyryp, qandastardy qonystandyrý jáne etnıkalyq qazaqtardy qabyldaý boıynsha jańa tásilderdi ázirleý qajet. Tarıhı otanyna kóshýge nıet bildirgen etnıkalyq qazaqtar úshin «bir tereze» qaǵıdatyn engizý qajet», - dedi Úkimet basshysy búgin Eńbek jáne halyqty áleýmettik qorǵaý mınıstrliginiń keńeıtilgen alqa májilisinde.

Osy oraıda Premer-Mınıstr «bir tereze» fýnktsııasyn Qazaqstannyń shet elderdegi mekemeleri atqaratyndyǵyna nazar aýdartty.

«Olarǵa júginetin etnıkalyq qazaqtar kirý vızasyn ǵana emes qandas mártebesin berý jóninde sheshim týraly, qonystaný aýmaǵy jáne jergilikti jerlerde beriletin memlekettik qoldaý týraly aqparatty alýy tıis», - dedi Álıhan Smaıylov.