Úkimet basshysy EO-ǵa múshe elder dıpmıssııalarynyń basshylarymen kezdesý ótkizdi

NUR-SULTAN. QazAqparat - QR Premer-Mınıstri Asqar Mamın ınvestıtsııalyq yntymaqtastyqty odan ári damytý máseleleri jónindegi Dıalog alańy aıasynda Eýropalyq Odaqqa múshe memleketterdiń dıplomatııalyq mıssııalarynyń basshylarymen kezekti kezdesý ótkizdi, dep habarlaıdy QR Úkimetiniń baspasóz qyzmeti.

«Tuńǵysh Prezıdent - Elbasy Nursultan Nazarbaev pen Memleket basshysy Qasym-Jomart Toqaev Eýropalyq Odaq elderimen yntymaqtastyqqa Qazaqstannyń syrtqy saıasatynyń basymdyqty baǵyttarynyń biri retinde qarastyra otyryp, zor kóńil bóledi», - dedi A. Mamın.

Úkimet basshysy EO-nyń Qazaqstannyń negizgi ınvestorlarynyń biri ári iri saýda seriktesi ekenin atap ótti. Bıyl 6 aıda Eýropalyq Odaq Qazaqstan ekonomıkasyna $5,4 mlrd-tan astam ınvestıtsııa saldy – bul birinshi jartyjyldyqtaǵy tikeleı sheteldik ınvestıtsııalardyń jalpy aǵymynyń jartysyn quraıdy. Bıylǵy 9 aı ishinde EO-men taýar aınalymy $24 mlrd-qa jýyq boldy.

Asqar Mamın Eýropalyq Odaq elshilerin Qazaqstannyń EO-men saýda-ekonomıkalyq jáne ınvestıtsııalyq yntymaqtastyǵyn qoldaý boıynsha budan arǵy ashyq ári belsendi dıaloqa shaqyrdy.

Eýropalyq Odaq elshileri QR Premer-Mınıstrine EO-nyń jańa aımaqtyq úsh jobasyn tanystyrdy: «Ortalyq Azııadaǵy ınvestıtsııalyq qyzmet komponentteri», «Ortalyq Azııada halyqaralyq saýdany qoldaý» jáne «Zańnyń ústemdigi máseleleri boıynsha EO-OA baǵdarlamasy».

Taraptar Qazaqstandaǵy eýropalyq kompanııalardyń qyzmetin, onyń ishinde tenderlerge qatysý múmkindikteri men jergilikti qamtý normalaryn talqylady.

Kezdesýge QR-daǵy EO Ókildiginiń Basshysy Sven-Olov Karlsson, Germanııa, Frantsııa, Nıderlandy, Polsha, Avstrııa, Ispanııa, Estonııa, Italııa, Belgııa, Latvııa, Grekııa, Ispanııa, Horvatııa, Rýmynııa, Slovakııa, Vengrııa, Fınlıandııa, Chehııa elshileri, Portýgalııa, Bolgarııa ókilderi, iri eýropalyq kompanııalar men «Frantsııa - Qazaqstan» SÓP basshylary qatysty.