Úkimet basshysy energııa tutynýdy azaıtý algorıtmderin daıyndaýdy tapsyrdy
ASTANA. QazAqparat - Premer-mınıstr Baqytjan Saǵyntaev Investıtsııalar jáne damý mınıstri Jeńis Qasymbekke energııa tutynýdy azaıtý algorıtmderin daıyndaýdy tapsyrdy, dep habarlaıdy QazAqparat tilshisi.
«Elimizdegi energııa únemdeý tapsyrmasyn Elbasy birneshe ret atap ótken bolatyn. Bul rette Investıtsııalar jáne damý mınıstrligi ónimniń ár birligine (...) shaqqanda energııa tutynýdy azaıtý algorıtmderin daıyndaý qajet. Jalpy, ónerkásip salalarynyń energııany kóp qajet etýin azaıtý jóninde bizde tek ortaq derekter ǵana bar», - dedi Baqytjan Saǵyntaev búgingi Úkimet otyrysynda.
Premer-mınıstr «Samuryq Qazyna» aktsıonerlik qoǵamy basqarmasynyń tóraǵasy Ahmetjan Esimovke de osy máselege nazar aýdarý kerektigin atap ótti.
«Ahmetjan Smaǵululy, sizge de ótinish, «Samuryq-Qazyna» quramyndaǵy kompanııalardyń energııa tutynýyn jóndeý jónindegi jumystardy durys jolǵa qoıý kerek. Jeńis Mahmuduly, sizge osy naqty algorıtmderdi ázirleýdi tapsyramyn. Óńir ákimdikteri ınvestorlarmen jáne energııany kóp jumsaıtyn kásiporyndarmen jumysty jandandyrýy qajet. Onyń ishinde memlekettik-jekeshelik áriptestik jobalaryn iske asyrý jáne energııany únemdeýdi nasıhattaý jumysyna kóńil bólinýi tıis», - dedi ol.
Baqytjan Saǵyntaev MJÁ boıynsha naqty jumys Pavlodar, Qyzylorda jáne Atyraý oblystarynda ǵana júrip jatqanyn eske saldy.
«Al energııa únemdeý bólimderi Pavlodar men Qostanaı oblystarynda ǵana bar. Basqa óńirlerde jumys joq. ıAǵnı, aıtyp otyrǵan algorıtm joqtyń qasy. Ózgeris bolyp jatyr ma, joq pa - qadaǵalaıtyn múmkindik joq. Sondyqtan, qurmetti ákimder osy máselege kóńil bólýdi suraımyn», - dep túıdi Úkimet basshysy.
Eske sala ketsek, buǵan deıin Investıtsııalar jáne damý mınıstri Jeńis Qasymbek energııany únemdeý baǵytynda Úkimet basshysynan jumysty kúsheıtý jóninde tapsyrma berýdi suraǵan bolatyn.
