Úkimet basshysy el halqynyń shaǵymdaryna qatysty pikir bildirdi

ASTANA. QazAqparat - Azyq-túlikpen qamtamasyz etý salasynda deldaldyq shemalardy joıý máselesine ekpin qoıylady. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Azamattardyń talap-tilekteri men ótinishterine der kezinde jaýap berý bizdiń júıeli ári nátıjeli jumysymyzǵa aınalýy tıis. Olardyń deni negizinen jumyspen qamtý, tabysty arttyrý, turǵyn úımen qamtamasyz etý jáne tirshilikke qajetti ınfraqurylym nysandaryna qatysty. Alaıda, qoǵamdy eń aldymen, áleýmettik mańyzy bar azyq-túliktiń baǵasyn turaqtandyrý máselesi tolǵandyryp otyr. Bul máseleni jańa tásilderdi qoldana otyryp, sheshý qajet», - dedi Á. Smaıylov Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde.

Onyń aıtýynsha, deldaldyq shemalardy joıyp, forvardtyq satyp alýdy qoldaný, sondaı-aq shıkizat satyp alý úshin kásiporyndarǵa aınalym qarajatyna kredıt berý kerek. Sonymen birge, Saýda, Aýyl sharýashylyǵy mınıstrlikteri maýsymaralyq kezeńde baǵany turaqtandyrý boıynsha qosymsha usynystar berýi tıis.

«Jylytý maýsymyn talqylaý kezinde biz energııa obektileri men jelilerdiń máselesin birneshe ret kóterdik. Bıyl turǵyndardyń tarapynan aıtylǵan aryz-shaǵymdardyń kóp bóligi jylý jelileriniń jaǵdaıyna qatysty boldy. Sondyqtan, osy jyldan bastap olardy jóndeý jáne rekonstrýktsııalaý boıynsha aýqymdy jumys bastalady», - dedi Úkimet basshysy.

Budan buryn habarlanǵandaı, Álıhan Smaıylov ekonomıka salasyndaǵy basty mindetterdi aıtty.