Úkimet basshysy eksportqa salynǵan qarjynyń qandaı paıda ákelgendigin jarııalady
ASTANA. QazAqparat - Úkimet basshysy Baqytjan Saǵyntaev eksport salasyndaǵy kemshilikterdi anyqtaýdy tapsyrdy, dep xabarlaıdy QazAqparat tilshisi.
"Baıandamalardan kórip otyrǵanymyzdaı, búginde eksport salasynda oń serpin baıqalyp otyr. 800 taýarlyq pozıtsııa boıynsha 122 memleketke óz ónimderimizdi shyǵaryp otyrmyz. 2017 jyldyń qorytyndysymen birge 30 protsenttik ósim bar. Degenmen, barlyq múmkindigimizdi paıdalanyp otyrmyz ba? Joq pa? Sol jaǵyn qarastyrý qajet. Qandaı kedergiler bar? Byltyr biz sol kedergilerdi alyp tastaýǵa arnalǵan jol kartasyn ázirleý boıynsha tapsyrma bergen bolatynbyz. Ókinishke qaraı, Jeńis Maxmuduly, sol jol kartasy áli daıyndalǵan joq. Erbolat Áskerbekuly, osy mamyr aıynda jol kartasyn daıyndap, eksportty ártaraptandyrý jónindegi keńestiń otyrysyna shyǵarý qajet", - dedi B. Saǵyntaev.
Premer-Mınıstrdiń sózine qaraǵanda, shet eldermen aradaǵy saýda-ekonomıkalyq kelisimderdi jan-jaqty zerdelep, ol qujattardyń múmkindikterin qanshalyqty paıdalanyp otyrǵanymyzdy anyqtaý qajet. "Óıtkeni bir jyldyń ishinde qarjylyq kómekti bar bolǵany 40 kompanııa ǵana alǵan. Búginde eksportqa shyǵatyn kompanııalardyń servıstik qyzmetine bólingen bir teńge 50 teńgelik eksporttyq kelisimsharttardy ákelip otyr. Ol - óte úlken kórsetkish. Bul degenimiz, árbir teńgeden biraz aqsha túsip otyr. Sol sebepti osy baǵyttaǵy jumysty jalǵastyrý qajet", - dep atap kórsetti B.Saǵyntaev.
Aıta keteıik, búgingi otyrysta QR Investıtsııalar jáne damý mınıstri Jeńis Qasymbek otandyq taýarlardy shetelge shyǵarý boıynsha esep berdi. Sondaı-aq, mınıstr otandyq taýarlardy shetelge eksporttaýdyń negizgi problemalaryn atap ótti.
