Úkimet basshysy Ekibastuzdaǵy qazaqstandyq maınıngtik kompanııa jumysymen tanysty
ASTANA. QazAqparat - QR Premer-Mınıstri Baqytjan Saǵyntaev Pavlodar oblysyna issapary kezinde ashylǵanyna kóp bolmaǵan maınıngtik qyzmet kórsetetin «BNKA Enerdjı» JShS-niń tehnıkalyq múmkindigin baǵalap, bolashaq damý josparymen tanysyp qaıtty, dep habarlaıdy primeminister.kz.
Maınıngtik jáshikter men basqarý beketindegi elektrlik esepteýishterdiń jumysyn baǵalaǵan Premer-Mınıstrge «BNKA Enerdjı» JShS-niń tehnıkalyq dırektory J. Áldebergenov data-ortalyqtyń bar múmkindigin kórsetip, atqarylyp jatqan jumys pen alǵa qoıǵan maqsat týraly baıandap berdi. Joba birneshe kezeńmen júzege asyrylyp jatyr. Alǵashqysy 6 tamyzda jumysyn bastaǵan, qazir kompanııa 4 MVt elektr energııasyn tutynady.
Jospar boıynsha 20 qyrkúıekte qosylatyn kelesi kompanııada bul kórsetkish 11 MVt deıin artpaq. Odan keıingi beles 10 qarashada 18 MVt kórsetkishimen baǵyndyrylmaq. Jyl sońynda «BNKA Enerdjı» JShS 33 MVt tutynýdy josparlap otyr.
Qazaqstandyq kompanııa maınıngtik fermalarǵa hostıng qyzmetin usynýmen de aınalysady. Bul qyzmet ishine maınıng qurylǵylaryn ornatý, qural-jabdyqty baqylaý jáne saraptaý, úzdiksiz elektr energııasy men ınternet jelisimen qamtamasyz etý jumysy kiredi. Qazirgi ýaqytta atalmysh kompanııa osy saladaǵy aldyńǵy azýly kásiporyndardyń qatarynda. Ortalyqtyń dál osy óńirde ashylýyna elektr qýatynyń artylýy men tarıfiniń tómendigi, kásibı deńgeıi joǵary mamandardyń bolýy sebep bolǵan. Endi iri maınıngtik fermalar men kompanııalar tartylsa, Pavlodar aımaǵy elimizdegi blokcheın-tehnologııalardy qoldanatyn aldyńǵy qatarly ortalyqqa aınalary sózsiz.
Búginde quny 5,7 mlrd tg turatyn ortalyqta 16 adam jumys isteıdi. Joba aıaqtalǵannan keıin 60-qa jýyq jumys orny qurylady. Toqsan saıyn mamandar Qytaıǵa biliktilikti arttyrý úshin maınıng-jabdyqtar shyǵarylatyn zaýytqa jiberiledi. Ol jaqta mamandar jabdyqtardy qalaı jóndep, olarmen qalaı jumys isteý kerek ekenin úırenedi.
