Úkimet basshysy Doing Business reıtınginde tómendeýdi «qajyrly» qyzmetkerlermen baılanystyrdy
ASTANA. QazAqparat -QR Úkimetiniń basshysy Baqytjan Saǵyntaev bıznesti júrgizý jónindegi «Doing Business» álemdik reıtıngindegi Qazaqstannyń orny jaıynda pikir bildirdi, dep habarlaıdy QazAqparat.
Búgin «Atameken» UKP tóralqasynyń keńeıtilgen otyrysynda Premer-Mınıstr osy reıtıngte elimizdi joǵary orynǵa kóterý úshin úsh jylda aýqymdy jumystar atqarylǵanyn atap ótti.
«Ótken jyldyń qorytyndysy boıynsha biz 35-orynda boldyq, al bıyl 36-oryndamyz. Shynyn aıtqanda, biz alǵashqy jıyrmalyqtyń arasynda tuǵyrlanamyz dep boljaǵan edik. Sebebi depýtattardyń qoldaýymen búginde «Doing Business» boıynsha altynshy túzetýler paketimen kirdik. Bıyl kóptegen baptarmen kirdik, biraq bir orynǵa sheginip kettik. Reıtıngtiń bir pýnkti boıynsha álemde jalpy birinshi oryndy ıelendik. Nátıjesinde, ótken jyly biz qurylys bóliginde alǵa qaraı 100 pýnktige serpilgen kezde, bizdiń «qajyrly» qyzmetkerler keıbir nárselerdi jasyrǵany anyqtaldy. Quqyq qoldaný sharalary bastalǵan kezde, osynyń barlyǵy ashyldy. Osy anyqtalǵannyń barlyǵy bizdi bir pýnktige artqa qaraı tartty. Osy oraıda oryn alǵan jaǵdaı bizdi qynjyltty. Atap aıtqanda, bul baǵytta aýqymdy jumys atqarylǵan bolatyn», - dedi Úkimet basshysy.
Onyń sózine qaraǵanda, qazirgi ýaqytta jaǵdaıdy túzetý turǵysynda tıisti sharalar júzege asyrylyp jatyr.
«Búginde atalǵan kemshilikti túzetip jatyrmyz. Aldaǵy jyly bul turǵydaǵy ahýal basqasha bolady dep oılaımyz», - dedi ol.
