Úkimet basshysy Deutsche Bank ókilderimen yntymaqtastyq máselelerin talqylady

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev Ortalyq jáne Shyǵys Eýropa boıynsha basqarýshy dırektor jáne bas atqarýshy dırektory Peter Tılstiń basshylyǵymen Deutsche Bank AG ókilderimen kezdesti, dep habarlaıdy primeminister.kz.

Kezdesý barysynda tsıfrlandyrý, ınvestıtsııalar jáne ınfraqurylymdy damytý salasyndaǵy birlesken jobalardy júzege asyrý jáne yntymaqtastyqty odan ári damytý máseleleri talqylandy.

Atap aıtqanda, otyrys qatysýshylary AHQO bırjasy alańyndaǵy IPO-ǵa ulttyq kompanııalardyń shyǵarylýy men «Astana» halyqaralyq qarjy ortalyǵynyń jumysyn eskere otyryp ınvestorlarǵa ashylǵan múmkindikterdi qarastyrdy.

Deutsche Bank AG ókilderi birqatar jobalarǵa, sonyń ishinde «Tsıfrlyq Qazaqstan» memlekettik baǵdarlamasyn iske asyrýǵa qatysýǵa múddeli ekenin bildirdi.

Budan ózge, Qazaqstan-German iskerlik keńesi jumysynyń aıasyndaǵy ózara is-qımylǵa erekshe nazar aýdaryldy.

Aıta ketken jón, Deutsche Bank AG 1870 jyly Berlınde halyqaralyq bıznesti keńeıtý, sondaı-aq Germanııanyń basqa eýropalyq eldermen jáne syrtqy naryqtarmen saýda qarym-qatynasyn damytý maqsatynda qurylǵan. Deutsche Bank AG ókildigi Qazaqstanda 1993 jyly ashyldy.