Úkimet basshysy depýtattyń Astana kóshelerine qoǵam jáne memleket qaıratkerleriniń esimin berý jónindegi usynysyn qoldaıdy
ASTANA. Naýryzdyń 2-si. QazAqparat - Aldaǵy ýaqytta Elordamyz Astana qalasynyń ortalyǵynda Abaı Qunanbaıulyna jańa eskertkish ornatý, Kereı men Jánibek handarǵa, Názir Tórequlovqa, «Qazaqstan - ıadrolyq qarýdan táýelsiz el» taqyrybyna, Qurmanǵazyǵa jáne taǵy basqa tulǵalarǵa eskertkishter ashý josparlanyp otyr jáne olardyń qatary áli de arta túsedi. Bul jóninde QR Premer-Mınıstri Kárim Másimov QR Parlamenti Májilisiniń depýtaty Irak Elekeevtiń depýtattyq saýalyna bergen jaýabynda jazǵan,
dep habarlaıdy QazAqparat.
Úkimet basshysy Astana qalasynyń kóshelerine tarıhı tulǵalarymyz ben memleket qaıratkerleriniń esimin berý, eskertkishin ornatý tárizdi este qaldyrý sharalaryn júzege asyrýǵa qatysty depýtat saýaly qaralǵanyn, Otanymyz úshin orasan eńbek sińirgen, joǵary marapatqa laıyqty kórnekti memleket jáne qoǵam qaıratkerlerin ulyqtaý maqsatynda kóterip otyrǵan usynystardy qoldaıtynyn jetkizgen.
Astana qalasynyń ákimshiligine qalanyń kóshelerine Safýan Shaımerdenovtiń, Muhametjan Tynyshbaevtyń, Álkeı Marǵulannyń Ermuhan Bekmahanovtyń, Manash Qozybaevtyń, Borıs Eltsınniń, Aleksandr Knıagınınniń, Nıkolaı Makıevskııdiń esimderin berý máselesin qalalyq onomastıkalyq komıssııanyń aldaǵy otyrysynda qaraýǵa tapsyrma berilgen.
«Búginde elimizde, onyń ishinde Astana qalasynda da tarıhı tulǵalarymyzǵa arnalǵan eskertkishter sany birtindep artyp keledi. Onyń ishinde jaqynda ornatylǵan «Qazaq eli» sáýlettik-músindik keshenin, Kenesary han, Bógenbaı batyr, J.Jabaev, S.Seıfýllın, Á.Moldaǵulova, B.Momyshuly eskertkishterin jáne Tóle bı, Qazybek bı, Áıteke bı eskertkish-keshenin aıtýǵa bolady.
Sonymen qatar, qazaqtyń belgili memleket jáne qoǵam qaıratkerlerine arnalǵan eskertkishter elimizdiń ózge de aımaqtarynda ornatylyp jatqanyn habarlaımyn. Mysaly, osy kúnde Qarasaı, Naýryzbaı, Raıymbek batyrlar (Almaty oblysy), I.Taımanuly men M.Ótemisuly (Atyraý qalasy men oblysy), Buhar jyraý (Qaraǵandy qalasy men Pavlodar oblysy), Syrym Datuly (Oral qalasy men Batys Qazaqstan oblysy), Bógenbaı batyr (Aqmola oblysy), H.Dosmuhamedov (Atyraý qalasy men oblysy), J.Dosmuhamedov (Oral qalasy), M. Dýlatov (Qostanaı oblysy), A.Baıtursynuly (Almaty qalasy men Qostanaı oblysy), M.Tynyshbaev (Almaty oblysy), M. Shoqaı (Qyzylorda oblysy), Á. Marǵulan (Pavlodar oblysy men Almaty qalasy), M. Jumabaev, M. Qozybaev (Petropavl qalasy), S. Sádýaqasovqa (Soltústik Qazaqstan oblysy) jáne t.b. eskertkishter ornatylǵan.
Budan bólek, jaqyn jyldary Semeı qalasynda Alash qaıratkerlerine arnalǵan úlken monýmentaldy eskertkish, Petropavl qalasynda Qojabergen jyraýǵa, Oral qalasynda I.Taımanuly men M.Ótemisulyna, Almaty qalasynda A.Baıtursynulyna, Raıymbek batyrǵa, M.H.Dýlatıge, T.Rysqulovqa, B.Momyshulyna eskertkishter ornatý josparlanǵan.
Al osy jyly M.Dýlatovtyń týǵanyna 125 jyl tolýyna oraı, elimizde onyń kitaptaryn basyp shyǵarý, M.Dýlatuly týraly derekti fılm túsirý, ǵylymı-praktıkalyq konferentsııa men saltanatty kesh ótkizý jáne t.b. is-sharalar ótkiziletinin jetkizemin.
Sondaı-aq M.Ótemisulynyń esimi Batys Qazaqstan Memlekettik ýnıversıtetine, S.Asfendııarovtyń esimi Almatydaǵy Qazaq Ulttyq Medıtsına ýnıversıtetine, M.Tynyshbaevtiń esimi Qazaq kólik jáne kommýnıkatsııa akademııasyna, H.Dosmuhamedovtyń esimi Atyraý memlekettik ýnıversıtetine, M.Qozybaevtyń esimi Soltústik Qazaqstan memlekettik ýnıversıtetine, A.Baıtursynulynyń esimi Til bilimi ınstıtýtyna, Á.Marǵulannyń esimi Arheologııa ınstıtýtyna berilgenin habarlaımyn.
Kóshe atyn berý máselesine kelsek, Astana qalasynda Qarasaı batyr, Naýryzbaı batyr, Qabanbaı batyr, Qojabergen jyraý, Muryn jyraý,Dospambet jyraý,Shalkıiz jyraý, Syrym Datuly, I.Taımanuly, M.Ótemisuly, Bógenbaı batyr, Batyr Baıan, M. Tynyshbaev, Á.Qashaýbaev,Á.Qasteev, M.Shoqaı, H.Dosmuhamedov, M.Dýlatov atynda kóshe bar ekenin jáne atalǵan tulǵalardyń esimderin ulyqtaý maqsatynda elimizde basqa da ıgi ister jalǵasyn taba beretinin málimdeımin»,- deıdi óz jaýabynda QR Premer-Mınıstri Kárim Másimov.
Sonymen qatar QR Úkimeti janyndaǵy Memlekettik onomastıka komıssııasy jumys isteıtindigin jáne onyń quramynda mınıstrlikter men vedomstvolardyń basshy ókilderimen birge belgili ǵalymdar, sonyń ishinde Parlament Májilisiniń depýtattary bar ekendigin jetkizgen.
Munymen qosa, jergilikti ókildi jáne atqarýshy organdar tarapynan túsken usynystar boıynsha respýblıkadaǵy memlekettik deńgeıdegi mekemeler men uıymdarǵa, fızıkalyq-geografııalyq obektilerdi ataý jáne qaıta ataýǵa qatysty máseleler Memlekettik onomastıka komıssııasynyń oń sheshimi bolǵan jaǵdaıda, belgilengen tártip boıynsha Úkimet qaýlysymen iske asyrylatyny málimdelgen.
Sonymen qatar Úkimet basshysy qazaq zııalylaryn este qaldyrý maqsatynda Mádenıet jáne aqparat mınıstrligi S.Baqtygereevtiń «Halel Dosmuhamedov», Ákim Tarazıdiń «Mustafa Shoqaı», M. Tynyshbaevtyń «Istorııa kazahskogo naroda», Dáýlet Muhamedjanulynyń «Mýhamedjan Tynyshpaev. Naýchnye trýdy, polıtıcheskıe vystýplenııa, dokýmenty», «Tarıhı tulǵa taǵylymy» serııasymen G. Mirjaqypqyzynyń «Mirjaqyp Dýlatov», M.Kozybaevtyń «El jáne Er» serııasymen «Tulǵalar tuǵyry» jáne «Sana» serııasymen «Kıeli táýelsizdik» atty kitaptardy jaryqqa shyǵarǵanyn habardar etip otyr.
