Úkimet basshysy depýtattyq saýalda kórsetilgen problemalardyń sheshilý joldary tolyqtaı eskerilgenin málimdedi
ASTANA. Naýryzdyń 26-sy. QazAqparat - QR Parlamenti Májilisiniń depýtaty Ýálıhan Qońyrbaev ústimizdegi jyly qańtardyń 13-i kúni QR Premer-mınıstri Kárim Másimov myrzaǵa depýtattyq saýal joldap, Astana mańyndaǵy eldi mekenderdiń ózekti máselesin kótergen bolatyn.
Onda depýtat Qaraótkel (Ilınka kenti) aýyly Astanadan 18 shaqyrym jerde bolǵanymen, turǵyndardyń áleýmettik jaǵdaıy syn kótermeıtinin aıtty. Aýylda emhana, aýrýhana, klýb, kitaphana, balabaqsha joq ekenin, avtobýs qatynasynyń da turǵyndardyń kóńilinen shyqpaı otyrǵanyn jetkizdi. Úkimet basshysyna saılaýshylardyń birneshe talaby bar ekenin málimdedi, dep habarlaıdy QazAqparat.
Jýyrda depýtat saýalyna QR Premer-Mınıstri Kárim Másimov myrzadan jaýap keldi.
Úkimet basshysy aǵymdaǵy jyldyń basynda Astana qalasy mańynda ornalasqan Aqmola oblysynyń eldi mekenderiniń búgingi tańda oryn alyp otyrǵan problemalaryn keshendi túrde sheshý maqsatymen quramyna múddeli memlekettik organdar kirýi kózdelgen vedomstvoaralyq komıssııa qurý týraly sheshim qabyldanǵanyn jetkizdi.
«2010 jyldyń aqpan aıynda qurylýy belgilengen atalmysh komıssııanyń quzyryna:
- Úkimet tarapynan ázirlenip jatqan eldiń aýmaqtyq-keńistik damýynyń boljamdyq shemasynyń jobasynda astanalyq aglomeratsııany qurýdyń teorııalyq negizin (jeke bóle otyryp) anyqtaý;
Astana qalasynyń mańyndaǵy aýyldardyń áleýmettik-turmystyq jaǵdaıyn jaqsartýǵa qatysty buǵan deıin qabyldanǵan strategııalyq josparǵa respýblıkalyq jáne jergilikti (Aqmola oblysy men qala mańyndaǵy aýdandardyń) bıýdjetterde iske asyrylýy qarastyrylǵan ınjenerlik, áleýmettik ınfraqurylymdardy damytý jobalaryn qarjylandyrýdy jáne búgingi tańda oryn alyp otyrǵan problemalardy keshendi túrde sheshýge baǵyttalǵan nysanaly ındıkatorlar men mindetterdi engizý;
- elimizdiń 2015 jylǵa deıingi aýmaqtyq damý strategııasyn iske asyrý jónindegi 2009-2012 jyldarda oryndalýy kózdelegen is-sharalar josparyna sáıkes 2011-2013 jyldarǵa arnalǵan respýblıkalyq bıýdjetti qalyptastyrý kezinde atalǵan aımaqtyń turǵyn-úı jáne ınfraqurylym qurylystaryn josparlaýdyń keshendi shemasyn ázirleýge arnalǵan bıýdjettik ótinimdi respýblıkalyq bıýdjet komıssııasynyń qaraýyna daıyndaý sııaqty is-sharalar kiretin bolady.
Qazirgi tańda Astana qalasy mańyndaǵy oblystyń Arshaly, Tselınograd jáne Shortandy aýdandaryna qarasty 16 eldi mekende, onyń ishinde Qaraótkel aýylyn qosa alǵanda, bilim berý, densaýlyq saqtaý jáne halyqtyń turmysyna qajetti nysandardy salý jáne qaıta jóndeý jónindegi ınvestıtsııalyq jobalardyń tizbesi anyqtalýda.
Atalǵan tizbe daıyndalǵannan soń ol respýblıkalyq bıýdjettik komıssııasynyń qaraýyna engiziletin bolady.
Bunymen qosa:
- Qaraótkel aýylynda respýblıkalyq bıýdjet qarajatynyń esebinen 1200 oryndyq orta mekteptiń qurylysyn júrgizý josparlanyp, aǵymdaǵy jyly jobalyq-smetalyq qujattamasyn ázirleý men ony jergilikti jerge beıimdeý jumystaryna 18 mln. teńge bólindi.
Qoldanysqa tapsyrylýy 2012 jyl bolyp belgilengen mektep qurylysynyń jobaaldy jumystary júrgizilip, jer telimin bólý sharalary iske asýda;
- «Aqmola oblysy, Tselınograd aýdany, Qaraótkel kentiniń elektr energııasymen qamtamasyz etý jelisin jáne elektr energııasymen qamtamasyz etý nysandaryn salý jáne qaıta jóndeý» jobasynyń tehnıkalyq-ekonomıkalyq negizdemesi ázirlenip, belgilengen tártippen memlekettik saraptamadan ótti. Qazirgi ýaqytta jobany júzege asyrýǵa qajetti qarajatty bólý qujattary respýblıkalyq bıýdjettik komıssııasynyń qaraýyna engizilýge daıyndalýda.
Úkimet tarapynan atqarylyp jatqan sharalar aıasynda Sizdiń depýtattyq saýalyńyzda kórsetilgen problemalardyń sheshilý joldary tolyqtaı eskerilgen jáne quzyrly memlekettik organdardyń baqylaýynda bolady.
Al, Qaraótkel aýylyn Astana qalasynyń «Úrker» yqshamaýdanymen biriktirý máselesi keleshekte, joǵaryda atalǵan is-sharalardyń nátıjelerin eskere otyryp, jergilikti ókiletti organdardyń sheshimi túsken jaǵdaıda qarastyrylatyn bolady» delingen QR Premer-Mınıstri Kárim Másimovtiń depýtattyń saýalyna bergen jaýabynda.
