Úkimet basshysy depýtat kótergen máselege oraı memlekettik organdar men qoǵamdyq uıymdardyń qatysýymen jumys tobyn qurý jóninde tapsyrma berdi
ASTANA. Qazannyń 23-i. QazAqparat /Aıdyn Báımen/ - Aldaǵy ýaqytta túıindi máselelerdi jan-jaqty zerdelep, birlese qarastyrý úshin múddeli memlekettik organdar men qoǵamdyq uıymdar ókilderinen quralatyn jumys tobyn qurý jóninde tapsyrma berildi.
Bul jóninde QR Premer-Mınıstri Kárim Másimov myrza málim etti. Úkimet basshysy osy málimetti qyrkúıektiń 29-y kúni Májilis depýtaty Jaqyp Asanovtyń joldaǵan saýalyna bergen jaýabynda jazǵan. Depýtat óz saýalynda jastar tárbıesine qatysty másele kóterdi. Depýtatty qoldap birneshe áriptesteri qol qoıdy. Búgin Májilis depýtattarynyń atyna QR Premer-Mınıstri Kárim Másimovten jaýap keldi, dep habarlaıdy QazAqparat.
Úkimet basshysy básekege qabiletti tulǵa tárbıeleý, jastar arasynda salaýatty ómir saltyn qalyptastyrý - elimizdegi memlekettik jastar saıasatynyń atqarar basty mindetteriniń biri ekenin jazady.
Depýtattyń kóterip otyrǵan máselesi búgingi kúnde ózekti ekenin aıta kelip, atalǵan baǵytta memleket tarapynan keshendi jumystar júrgizilip jatqanyn habarlaǵan.
«Aǵymdaǵy jyly elimizde halyqtyń densaýlyǵyn saqtaý salasyn jetildirýge, jastar arasynda salaýatty ómir saltyn nasıhattaýǵa baǵyttalǵan birqatar zańnamalyq aktiler qabyldandy. Ózderińizge belgili, Qazaqstan Respýblıkasynyń Ákimshilik quqyq buzýshylyqtar týraly Kodeksine túzetýler engizilip, «Qazaqstan Respýblıkasynyń keıbir zańnamalyq aktilerine balalardyń qadaǵalaýsyz qalýynyń profılaktıkasy jáne kámeletke tolmaǵandar arasyndaǵy quqyq buzýshylyqtardyń aldyn alý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańy bekitildi. Sonymen qatar Elbasynyń tapsyrmasyna oraı Halyq densaýlyǵy jáne densaýlyq saqtaý júıesi týraly Kodeks qabyldandy.
Atalǵan zańnamalyq qujattardyń maqsaty - elimizdiń densaýlyq saqtaý júıesin damytý, azamattarǵa medıtsınalyq qyzmet kórsetý deńgeıin jaqsartý, qoǵamdyq tártip pen qaýipsizdikti saqtaý, sondaı-aq Sizder kóterip otyrǵan máselelerdi retteýge baǵyttalǵan.
Atalǵan jumys tobynyń mindeti - mádenı-demalý oryndary men sporttyq mekemeler qyzmetin damytý, túngi demalý oryndarynyń qyzmetin retteý, jastardyń bos ýaqytyn ótkizýin tıimdi úılestirý máselelerin qarastyrý bolmaq»,- depti óz jaýabynda Úkimet basshysy Kárim Másimov.
